Шоми рӯзи чоршанбе 1-уми декабр дар марзи Афғонистону Эрон байни нерӯҳои ду кишвар задухӯрди мусаллаҳона сурат гирифт. Талафоти ҷонӣ аз ду тараф ба қайд гирифта нашудааст.
Ин нахусутин даргирии марзбонони эронӣ бо ҳамотоёни афғонистонии худ дар замони раҳбарии Толибон буда, дар манотиқи назди сарҳадии вилояти Нимрӯзи Афғонистон бо Сиистони Балучистон сурат гирифтааст.
Саид Хатибзода, сухангӯи Вазорати корҳои хориҷии Эрон дирӯз ба расонаҳо гуфт, "асри чоршанбе ихтилофи марзие байни марзнишонон муҷиби тирандозӣ дар ҳавзаи марзи Сиистон шуд, ки бо ҳамоҳангии марзбонони ду тараф мавзӯъ мудирият ва поён ёфтааст."
Дар як иттилоияе ҳам, ки аз ҷониби сухангӯи Толибон Забеҳуллоҳи Муҷоҳид нашр шуд, гуфта мешавад, "дар вулусволии Ганги вилояти Нимрӯз байни муҳофизин (сарҳадбонон) афғон ва эронӣ дар сатҳи маҳаллӣ кадом сӯи тафоҳуме рӯх дода буд, ки акнун бо тафоҳуми ҳар ду ҷониб вазъият кунтрул шудааст."
Сайид Руҳуллоҳ Латифӣ, сухангӯи Гумруки Эрон ҳам ба "Меҳрнюс" гуфтааст, ки аз субҳи имрӯз ҳамлу нақли колоҳои тиҷоратӣ аз гузаргоҳи Милк дар вилояти Сиистон ва Балучистон аз сар гирифта шуд.
Дар расонаҳо ва шабакаҳои иҷтимоӣ ахбори зиду нақизи зиёде дар бораи ин даргирӣ нашр шудааст, вале расонаҳои эронӣ иллати онро ҳамла ба кишоварзони ин кишвар гуфтаанд, аммо нерӯҳои Толибон аз он сӯи тафоҳум таъриф кардаанд.
