Ҳайати Думаи давлатии Русия, ки дар Тоҷикистон қарор доштанд, мегӯянд, дар ин сафари худ ба Душанбе “он чизеро, ки ба касе писанд нест”, баррасӣ карданд.
Sputnik Тоҷикистон аз қавли Леонид Калашников, раиси Кумитаи Думаи давлатии Русия дар умури ИДМ хабар дод, ки ҳайати Думаи давлатии Русия дар Тоҷикистон бо намояндагони парлумони кишвар дар робита ба масъалаи шуғл ва мушкилоти муҳоҷирони кории тоҷик дар Русия гуфтугӯ кардаанд. Ин намояндаи ДДР таъкид карда, мегӯяд, масоилеро баррасӣ хоҳем кард, ки “дар он ҷо бояд чораҳои муайян андешида шаванд.”
Гуфта мешавад, вакилони рус барои баррасии “масъалаи мураккаби муҳоҷират” вориди пойтахти Тоҷикистон шуданд. Аммо тафсилоти ин мулоқоту гуфтушунидҳо нашр нашудааст ва маълум нест дақиқан вакилони ду кишвар кадом масъалаҳоро ҳал карданд. Танҳо зикр мешавад, ки яке аз мавзуоти муҳими гуфтугӯи ҳайатҳои ду кишвар “бо кор таъмин кардани муҳоҷирон мебошанд.”
Аммо Леонид Калашников таъкид карда, ки “Он чизеро, ки ба касе писанд нест, муҳокима хоҳем кард, ки дар он ҷо бояд чораҳои муайян андешида шаванд.”
Ин вакили рус мушаххас нагуфтааст, ки он масъала чист, ки “ба касе писанд нест” ва онҳо мехоҳанд онро баррасӣ кунанд. Аммо муддати чандест мақомоти Русия муҳоҷирони корӣ, бахусус тоҷикони зиёдеро дар ин кишвар тафтишу боздошт ва ҳатто аз Русия ихроҷ карданд.
Ба иттилои бархе манобеъ аз муҳоҷирони корӣ, мақомоти Русия вақти боздошти муҳоҷироне, ки шаҳрвандӣ надоранд ва ё дар асноди будубошашон мушкили қонунӣ вуҷуд дорад, ба онҳо пешниҳод мекунанд, агар дар ҷанги Украина ширкат кунад, барояш маблағи зиёд ва шаҳрвандии Русия дода мешавад, вале агар инро қабул накунад барои солҳои тӯлонӣ аз ин кишвар ихроҷ мешавад.
