Рӯзи 25-уми июл Вазорати энергетика ва захираҳои оби Тоҷикистон зимни нишасти хабарӣ руйхати корхона ва идораҳои аз ҳама зиёд аз барқ қарздорро эълон кард.
Бино ба иттилои масъулини ин вазорат, дар байни корхона ва идораҳои давлатӣ корхонаи алюминии Тоҷикистон “ТАЛКО” бо 492,5 милион сомони қарз дар ҷойи якум қарор дорад. Бо 134,3 сомонӣ қарз Агентии беҳдошти замин ва обёрӣ дар ҷойи дуюм ва ташкилоту муасисаҳои буҷетӣ бо 87,2 милион сомонӣ қарз дар ҷойи сеюм қарор доранд.
Гуфта мешавад, ширкати алюминии тоҷик “Талко”, ки солҳост раҳбарии онро додараруси Эмомалӣ Раҳмон, Ҳасан Асадуллозода ба дӯш дорад, ҳамасола дар аввали рӯйхати қарздортарин ширкатҳое қарор мегирад, ки пули барқро сари вақт пардохт намекунанд.
Ҳамчунин Вазорати энергетика мегӯяд, аҳолии кишвар низ аз барқ 1,5 милиард сомонӣ қарздоранд. Аммо ба иддаои аксари корбарон, аҳолӣ сари вақт пули барқро месупоранд, агар насупоранд масъулин барқи хонаҳояшонро қатъ мекунанд.
Иддаои қарздор будани мардум аз барқ дар ҳолест, ки Мирзо Исмоилзода, собиқ раиси “Барқи тоҷик” 1-уми январи соли 2021 низ гуфта буд, ки мардум аз барқ тақрибан 1,5 милиард сомонӣ қарздоранд.
Ба гуфтаи мунтақидон, дар муддати 3 сол тағйир накардани ин рақамҳо воқеӣ будани омори Вазорати энергетикаро, зери суол мебарад. Дар гузашта рӯзноманигорон низ ин миқдор қарздор будани аҳолиро шубҳанок гуфта буданд.
Бино ба маълумоти Вазорати энергетика, дар зарфи 6 моҳи соли равон дар ҷумҳурӣ ҳудуди 10, 4 млрд киловатт-соат нерӯи барқ истеҳсол шудааст, ки 7,2% камтар нисбат ба ҳамин давраи соли 2023 мебошад.
Тоҷикистон ба шиддат ба камбуди қуваи барқ рӯбарӯ аст, махсусан дар фасли зимистон мардумро ба қуваи барқ таъмин карда наметавонад ва дар бисёр аз монотиқи кишвар ҳарсол маҳдудияти барқ ҷорӣ мешавад. Аммо қимати истифодаи нерӯи барқ бошад ҳарсол гаронтар мешавад.
