Раҳмон вазъияти ноамнӣ дар марзи Тоҷикистону Афғонистонро бо ҳамсояҳо баррасӣ кард.
Раисҷумҳури Тоҷикистон Эмомалӣ Раҳмон рӯзи 6-уми июл бо чанде аз сарони кишварҳои Осиёи Марказӣ ва Русия суҳбати телефонӣ анҷом дод. Дар ин бора дафтари матбуоти Президенти Тоҷикистон хабар дод.
Раҳмон бо ҳамсуҳбатонаш, Шавкат Мирзиёев, Қосим-Жомарт Тоқаев ва Владимир Путин вазъияти ахири Афғонистон ва ноамнӣ дар марзи ин ду кишварро баррасӣ кард.
Раҳмон дар суҳбат бо Шавкат Мирзиёев вазъияти марзро хеле ногувор арзёбӣ кард. Ҷонибҳо барои ҳамоҳангсозии ҳамкории мақомоти қудратии ду кишвар дар бахши таъмини амният, бахусус дар таҳкими ҳифзи сарҳад бо Афғонистон изҳори омодагӣ карданд.
Раҳмон инчунин вазъияти ногувори марзро бо президенти Қазоқистон, Қосим-Жомарт Тоқаев ва президенти собиқи ин кишвар, Нурсултон Назарбоев баррасӣ кард.
Дар ҳамин замина суҳбати Раҳмон бо Путин низ анҷом шуд, ки ҷонибҳо таъмини амният дар марзи Тоҷикистону Афғонистон ва аҳамияти стратегӣ доштани ин нуқтаро таъкид карданд. Ҳамчунин масъалаҳои тақвияти ҳифзи сарҳади Тоҷикистону Афғонистон, инчунин расонидани ёрии моддию техникӣ ва кӯмак ба нерӯҳои марзбонии Тоҷикистон баррасӣ шуданд.
Ноамниҳои ахир дар Афғонистон СММ-ро низ нигарон кардааст.
Муколамаи Раҳмон бо раҳбарони кишварҳои ҳамсоя ва Русия дар ҳоле сурат мегирад, ки тайи ду ҳафтаи ахир вазъият дар кишвари ҳамсоя муташанниҷ шуда, Толибон беш аз 100 ноҳияҳои ин кишвар, ба хусус навоҳии наздимарзӣ бо Тоҷикистонро тасарруф карданд.
Дар пасманзари ин ноамниҳо Эмомалӣ Раҳмон рӯзи 5 июл дар ҷаласаи Шӯрои амнияти кишвар дастур дод, ки барои ҳифзи марз то 20 ҳазор сарбози эҳтиётӣ ба марзҳои Тоҷикистон бо Афғонистон эъзом шаванд.
