Ду ҳавопаймои ширкатҳои “Ural Airlines” ва ширкати “S7 Airlines”, ки мусофиронро аз Маскав ва Екатеренбург ба шаҳри Хуҷанди Тоҷикистон меоварданд, масири худро иваз карда, дар фурӯдгоҳи Тошкент нишасти изтирорӣ анҷом доданд.
Ба гузориши “РИА Новости” ба нақл аз намояндаи Фурӯдгоҳи байналмилалии Узбекистон, субҳи рӯзи 1-уми феврал як ҳавопаймо соати 06:13 ва дуюмӣ соати 06:53 ба вақти маҳаллӣ дар фурӯдгоҳи Тошкент ба замин фурӯд омаданд.
Бино ба иттилои манбаъ, ҳавопаймои ширкати “Ural Airlines” бо хатсайри SVR-8955 Екатеренбург-Хуҷанд ҳамроҳаш 78 мусофир ва ҳавопаймои ширкати “S7 Airlines” бо хатсайри SBI-3241 Маскав-Хуҷанд 187 мусофир доштаанд.
Сабаби нишасти изтирории ҳавопаймоҳои масири Русия Тоҷикистон дар фурӯдгоҳи Тошкент номусоид будани ҳаво ва фаромадани туман дар шаҳри Хуҷанд гуфта мешавад. Дар сурати мусоид шудани боду ҳаво ҳавопаймоҳо масири худро идома медиҳанд.
