Оҷонси байналмилалии рушди Амрико (USAID) дар ноҳияи Мурғоб нерӯгоҳи нави офтобиро сохта ба истифода додааст, ки он бо иқтидори 220 киловатт-соат нерӯ калонтарин дар Тоҷикистон ва дар нуқтаи аз ҳама баландтарини дунё ҷойгиршуда ба ҳисоб меравад.
Сафортаи Амрико дар Тоҷикистон рӯзи 12-уми ноябр хабар дод, ки Оҷонси байналмилалии рушди Амрико, ки барои хариду насби нерӯгоҳи барқии офтобӣ ба ширкати “Помир Энержӣ” кумак кардааст ва иқтидори онро 180 киловатт – соат гуфтаанд.
Дар хабари сафорати Амрико зикр гардидааст, ки нерӯгоҳи барқии офтобӣ барои тақвияти тавоноии нерӯгоҳи барқи обии “Тоҷикистон” насб шуд, ки 1.5 мегаватт нерӯи барқ тавлид мекунад.
Гуфта мешавад, нерӯгоҳи нав имкон медиҳад, таъмини мардум бо нерӯи барқ дар ҷараёни рӯз 50 дар сад зиёд шавад, ки дар ниҳоят сатҳи зиндагии онҳоро беҳтар ва ба рушди иқтисодии Мурғоб мусоидат мекунад.
Мурғоб, баландтарин ноҳияи Тоҷикистон аст, ки 3600 метр баландтар аз сатҳи баҳр ҷойгир аст, аз минтақаҳои дурдаст ба ҳисоб меравад ва 6000 сокини он аз шабакаи барқи “Помир Энержӣ” ҷудо ва аз нерӯи барқи мунназам ва кофӣ маҳрум буданд.
