Дар Нерӯгоҳи Барқӣ-Обии “Норак”-и шаҳри Норак агрегати №1 баъди таҷдид ва бозсозӣ аз нав мавриди баҳрабардорӣ қарор дода шуд.
Бино ба иттилои сомонаи Хадамоти матбуоти Президенти Тоҷикистон, 24-уми октябри соли 2022 дар шаҳри Норак “агрегати №1-и НБО “Норак” ба номи Турсун Улҷабоев баъд аз таҷдиду навсозӣ ба истифода дода” шуд.
Ба қавли манбаъ, ин агрегат бо тавоноии 375 МВт мавриди истифода қарор дода шуда, “истеҳсоли миëнаи солонаи нерӯи барқ 1,4 миллиард кВт соат” афзоиш меёбад.
Гуфта мешавад, лоиҳаи таҷдид ва барқарорсозии НБО “Норак” аз моҳи марти соли 2019 оғоз гардида, он ду марҳиларо дар бар мегирад. “Дар марҳилаи аввал се агрегат ва дар марҳилаи дуюм 6 агрегат бо таҷҳизоти асосӣ ва ëрирасон таҷдид карда мешавад”, омадааст дар хабар.
