Раҳбари Шӯрои рушди ҷомеаи шаҳрвандӣ ва ҳуқуқи инсони назди Президенти Федератсияи Русия Валерий Фадеев хостааст, ки он оилаҳои муҳоҷироне, ки таълими фарзандонашонро таъмин намекунанд, бояд аз кишвар хориҷ шаванд.
Ба гуфтаи Фадеев, дар Русия ва дар бархе кишварҳои Осиёи Марказӣ, волидонро метавонанд барои риоя накардани ҳуқуқи кӯдак ба таҳсил аз ҳаққи волидайнӣ маҳрум кунанд. Аммо, тавре ки ӯ мегӯяд, шаҳрвандони хориҷӣ, ки ба Русия меоянд, аксаран фарзандони худро ба мактаб намефиристанд, ки ин ҳуқуқи садҳо ҳазор кӯдакро поймол мекунад.
“Агар шаҳрвандони хориҷӣ қасди риояи қонунҳои кишвари иқоматро надоранд, бигзор ба кишвари худ баргарданд ва давлате, ки онҳо аз он ҷо омадаанд, ҳуқуқи кӯдаконашонро ба таҳсил таъмин кунад. Мо наметавонем ба ояндаи кӯдакон, ҳатто агар онҳо шаҳрвандони Русия набошанд, бепарвоёна муносибат кунем”- мегӯяд ин мақомдори рус.
Ӯ ҳамчунин иддао карда, ки ҷамъшавии кӯдакон ва наврасони бесаробон дар кӯчаҳо метавонад ба омили ҷиддии ҷинояткорӣ табдил ёбад.
Пештар вакили Дума аз ҳизби “Одамони нав” Сардана Авксентева низ чунин пешниҳодеро ба мақомоти Русия карда буд.
Баъд аз ҳамлаи террористӣ дар “Крокус Сити Ҳолл” дар баҳори соли 2024, мақомоти Русия як қатор тадбирҳоро алайҳи муҳоҷирон роҳандозӣ карданд. Аз ҷумла, аз моҳи апрели соли 2025 кӯдакони муҳоҷирон танҳо дар ҳолати гузаштан аз имтиҳони забони русӣ метавонанд ба мактаб пазируфта шаванд. Аммо мақомот аз 100 дарсад 81%-и дархостҳоро, бо баҳонаи норасоии ҳуҷҷатҳо, маълумоти носаҳеҳ ё набудани ҷойи холӣ дар мактабҳо, рад кардаанд.
Тибқи иттилои Вазорати корҳои дохилии Русия, дар ин кишвар беш аз 785 ҳазор ноболиғи шаҳрвандони хориҷӣ қарор доранд, вале танҳо 192,2 ҳазор нафари онҳо (24,5%) ба мактаб мераванд.
