Шабакаҳои барқи Душанбе соли гузашта 2,3 млрд кВт/соат нерӯи барқ гирифтаанд, ки 78 млн кВт нисбат ба соли 2019 зиёдтар гуфта мешавад. Дар ҳамин ҳол ба гуфтаи ширкати “Барқи тоҷик” сокинони шаҳри Душанбе аз ин ширкат 136 млн сомонӣ қарздоранд, ки ҳудуди 20% аз ҳаҷми умумии барқи истифодашуда дар пойтахтро дар бар мегирад.
“Азия – Плюс” аз манбааш дар ҳукумати шаҳри Душане навиштааст, ки беш аз 60% (1,4 млрд кВт/соат) дар ҳаҷми умумии барқи гирифта дар худи шаҳр – марказҳои барқу гармидиҳӣ масраф шудааст. Ҳаҷми барқи дар ин марказҳо масрафшуда нисбат ба соли 2019 ба андозаи 8% зиёдтар унвон гардидааст.
Гуфта мешавад, масрфаи як шабонарӯзии нерӯи барқ дар пойтахт 6,3 млн кВт/соат аст, ки тақрибан ба 10% аз ҳаҷми умумии таъминоти кишвар бо барқ баробар будааст.
Ҳачунин зикр гардидааст, ки омори талафоти техникии барқ дар шабакаҳои пойтахт мисли соли 2019 дар ҳаҷми 15,5% будааст.
Дар соли 2020 маблағи умумии барқи дар пойтахт масрафшуда 678 млн сомонӣ ва пули пардохтшуда барои он 542 млн сомониро ташкил додааст. Яъне зиёда аз 130 миллион маблағи барқ пардохт нашудааст.
Бино ба гуфтаи масъулин қарздорони асосӣ истеъмолгарони маишӣ мебошанд, ки ба ҳиссаи онҳо қариб 70% аз қарзи умумӣ дар шаҳр – наздики 95 млн сомонӣ рост меояд.
Дар шаҳрдорӣ қайд мекунанд, ки аҳолии пойтахт ба маблағи 341,5 млн сомонӣ барқ гирифта, танҳо 246,7 млн сомонӣ (72,2%) маблағ пардохт намудааст.
Қаблан дар “Барқи тоҷик” гуфта буданд, ки аҳолии ҷумҳурӣ ба ҷуз сокинони ВМКБ, бо назардошти бақияи солҳои пешин барои истифодаи барқ зиёда аз 1 млрд сомонӣ қарздор аст.
Вале коршиносони соҳа ин иддаои қарздории сокинонро рад мекунанд, ба назари онҳо аҳолӣ агар аз барқ қарздор бошад, дар ҳол нозирон барқашро қатъ мекунанд ва то маблағро пардохт накунад, барқро васл намекунанд.
Як коршиноси собиқадори ин соҳа ба шарти бурда нашудани номаш ба “Аздо тв” гуфт:
“Ман ҳамеша бар гузориш ва арқоми пешниҳоднамуаи ширкати “Барқи тоҷик” ва шабакаҳои барқӣ ба зери шубҳа назар мекунам, зеро як мислои оддӣ аст. Сокине, ки пули барқро пардохт намекунад нозири барқ дар як моҳ чанд маротиба назди хонааш меояд, дар ҳолати пардохт накардан барқ қатъ карда мешавад, пас чӣ гуна мардум қарздор будаанд?”
Дар инҷо як сирре ҳаст, маблағҳоро мегиранду “обу лой” мекунанд, дар ҳисобот мардумро қарздор мебароранд, дар асл мардум қарздор нестанд, маблағҳо дар хориҷи кишвар дар кадом бонкҳову офшорҳо маҳфузанд, вале заҷри онро мардуми бечора мекашад, мегӯяд манбаи мо.
