Оё дар ҳақиқат буҷет барои бардохти музди меҳнат афзудааст?
Дар буҷети ҳукумати Тоҷикистон барои соли 2021 оиди пардохти музди меҳнат 6 миллиарду 34 миллион сомонӣ пешбинӣ гардидааст.
Бино ба иттилои хабаргузории “Авесто” Вазорати молияи Тоҷикистон эълон карда, ки дар соли 2021 пардохти маблағи 6 миллиарду 34 миллион барои музди меҳнат пешбинигардида, нисбат ба соли 2020 наздик ба 701 миллион сомонӣ зиёд мебошад.
Тибқи омори худи мақомот, буҷет барои пардохти музди меҳнат дар соли гузашта ҳудуди 5 млрд 333 млн сомонӣ бо қурби моҳи январи соли 2020 550 млн доллар буд, вале оне, ки Ҳукумат мегӯяд, гӯё ин маблағ 701 млн сомонӣ афзудааст, ҷойи фикру андеша дорад.
Оё дар ҳақиқат буҷа барои пардохти маош афзудааст? 6 миллиарду 34 млн сомонӣ бо қурби имрӯза ба 534 миллион доллар баробар аст. Маълум мешавад, ки буҷа барои пардохти маош имсол чизе наафзуда, балки 180 млн сомонӣ ва ё 16 млн доллар кам гаштааст.
Гуфта мешавад, ки маоши миёна дар Тоҷикистон дар соли 2020 1661 сомонӣ будааст.
Музди меҳнат дар Тоҷикистон дар байни кишварҳои ИДМ то ба имрӯз дар пастарин зина қарор дорад.
Музди меҳнат дар Русия 730 доллар, Беларус 518 доллар, Қазоқистон 480 доллар ва Қирғизистон 239 доллар зикр мешавад.
Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.