Пас аз оғози даргириҳо миёни Эрону Исроил давлати Покистон ба таври расмӣ Доналд Трамп, расиҷумҳури Амрикоро барои дарёфти Ҷоизаи субли Нобел пешниҳод кард.
Ҳукумати Покистон гуфт, ба хотири “нақши Трамп дар ҳаллу фасли баҳсҳои ахири миёни Ҳиндустон ва Покистон, инчунин миёнаравӣ дар масъалаи оташбас байни Исроилу Эрон” ба дарёфти ин ҷоиза пешниҳод кардааст.
Вазири дифои Покистон Хоҷа Асиф изҳор дошт, ки Трамп барои талошҳояш дар пешгирии низоъ миёни ин кишварҳо сазовори чунин ҷоиза мебошад. Бархе таҳлилгарон дар Покистон бар ин бовар буданд, ки шояд ин иқдом Трампро водор созад, дар ҷанги Исроил ва Эрон ворид навашд ва ин тасмимашро бозбинӣ кунад. Аммо ин иқдом ҳам натавонист пеши вуруди Амрико ба ин ҷангро бигирад.
Бояд зикр кард, ки Трамп дар чанд маврид изҳор доштааст, ки орзӯи дарёфти Ҷоизаи Нобел барои сулҳро дорад.
Аммо, баъди паҳн шудани ин хабар, саҳифаи “Паёми Душанбе” — марбут ба ҳукумати Эмомалӣ Раҳмон бо пахши як навишта изҳор дошт, ки “Ҷоизаи сулҳи Нобел ҳаққи ҳалоли” Эмомлаӣ Раҳмон аст. Ин расонаи ҳукуматӣ Эмомлиро “Пешвои сулҳофар” хонда, сазовори ин ҷоиза донистааст.
Ин навишта баҳси зиёдеро миёни корбарони тоҷик дар шабакаҳои иҷтимоӣ ба миён овард.
Яке аз ҷонибдорони Эмомалӣ Раҳмон бо номи Юсуф Талабов дар зери он чунин шарҳ додааст:
“Агар дар дунё адолат мебуд, Пешвои миллати мо мебоист боз соли 1997 барои барқарор кардани сулҳи тоҷикон соҳиби Ҷоизаи Нобел мегашт. Танҳо дар соҳаи сулҳ не, балки пешниҳодҳои арзандаи Пешвои муаззам дар бахшҳои муҳити зист, оби тоза ва дигар самтҳо низ шоистаи қадрдонӣ мебошанд. Агар ин хидматҳоро як сиёсатмадори ғарбӣ анҷом медод, бешубҳа, соҳиби чандин ҷоиза мешуд.”
Корбари дигаре навиштааст: “Ҳақиқат ин аст, ки Пешвои мо лоиқи Ҷоизаи Нобел мебошад.”
Дар ҳамин ҳол, Илҳомҷон Яқубзода — яке аз мухолифони ҳукумат — дар саҳифаи худ ин пешниҳодро “Рашки Эмомалӣ Раҳмон ба Доналд Трамп” хондааст. Ӯ навиштааст: “Эмомалиро, ки 28 сол қабл маҷбур карданд то созишномаи сулҳи тоҷиконро имзо кунад, то имрӯз ягон мақом барои Ҷоизаи Нобел пешбарӣ накардааст. ҲНИТ ва ду созмони дигар ҳамаи ҳуҷҷатҳои ҷиноятҳои Раҳмоновро ба Додгоҳи байналмилалии Ҳага ирсол намуданд. Агар ҷоизае ҳаст, пас ин ‘ҷоиза’ ба ҷавобгари кишондани ӯст.”
Корбари дигар бо номи Муҳаммади Муҳиддин бо шеваи танзомез навиштааст:
“Ҷоизаи Нобелӣ ба ин ду ‘наҷотдиҳандаи’ сайёра камӣ мекунад! Бояд ҳамроҳ бо ҷоизаи Оскар тақдим шавад. Бо ‘маҳорати’ боло бо номи СУЛҲ мардумфиребӣ мекунанд.”
Инчунин рӯзноманигор Орзу Исоев низ дар ин маврид ибрози назар кардааст. Ба гуфтаи ӯ:
“Сулҳ бояд худ мақсад бошад, на воситаи ба даст овардани ҷоиза. Агар сулҳ ба хотири ҷоиза офарида шавад, на ба хотири оромии мардум — он арзише надорад. Намешавад бе ҷоиза сулҳ барқарор кард? Агар ҳадаф ҷоиза бошад, на тақдири инсоният — ҳаром бод ин шаҳд бар коми ҷоизаҷӯён!”
