Эмомалӣ Раҳмон, раисҷумҳури худкомаи Тоҷикистон дар як қатор аз вазорату идораҳои давлатӣ тағйироту ҷойивазкунии мақомдоронро анҷом дод.
Бино ба иттилои сомонаи расмии президент, имрӯз, 25-уми июл, Раҳмонов бо қароре муовини аввали вазири тандуристии кишвар Ғафур Мӯҳсинзода ва муовини дигараш Шодихон Ҷамшедро ба нафақа равон карда, Саломиддин Юсуфиро, ки то ин дам сардори Раёсати таҳсилоти тиббию фарматсевтӣ, сиёсати кадрҳо ва илми ҳамин вазорат буд, муовини аввал ва Хайрулло Ҳабибуллозода, собиқ сардори Раёсати тандурустии вилояти Суғдро муовини вазир таъйин кардааст.
Инчунин дар пайи ин ҷойивазкуниҳо Зафар Сафарализода, ки қаблан муовини сардори Раёсати кафолатҳои ҳуқуқи инсони Дастгоҳи иҷроияи Президент буд, ба курсии муовини вазири адлия ва Сафаралӣ Назарзода, ки то ин дам сардори муассисаи “Трести чарогоҳу мелиоративӣ”-и қисми таркибии ҳамин вазорат буд, ба курсии муовини вазири кишварзӣ такя задаанд. Машокир Назарзода, ҳамакнун муовини собиқи вазири кишоварзиро ба нафақа гусел кардаанд.
Тибқи қарору амрҳои дигари Эмомалӣ Раҳмон, дар ниҳоди тозатаъсис Агентии назорати давлатии энергетикӣ Меҳроб Муминзода ва Беҳруз Ҳасанзодаро курсиҳои муовини якум ва муовини директорро соҳиб шуданд. Инчунин Фирдавс Абдуллозода муовини якуми директори Агентии хизмати давлатӣ, Қосими Охун муовини сардори Саридораи бойгонӣ ва Зайниддинзода Фарух муовини якуми директор – сармуҳандиси МД “Мудирияти минтақаи зериобшавандаи Нерӯгоҳи барқи обии “Роғун” таъйин гардидаанд.
Раҳмонов пас аз тағийроту ҷойивазкунии имрӯзааш бо ин мақомдорон суҳбат карда, аз онҳо хостааст, то “софдилонаю содиқона ба нафъи давлат ва мардуми Тоҷикистон” кор кунанд.
Тибқи маъмул дар Тоҷикистон ҳама сола тағйироти кадрӣ сурат мегирад, аммо аксари коршиносон ин тағйиротро шаклӣ ва ҷойивазкунӣ медонанд. Зеро ба гуфтаи онҳо, одатан Эмомалӣ Раҳмон дар тақсимоти мансабҳо ихтисос ва донишу маҳоратро меъёр қарор намедиҳад, балки меъёр дар интихоби кадрҳо бештар шинос будану наздик будан ба хонавода аст ва аксар мақомдорон аз як вазифа барканор шуда, бидуни дар назар гирифтани дастовардҳои шахсӣ ва донишу маҳорат ба вазифаи дигар таъйин мегарданд ва ё кадрҳои нав мақомҳоро бо пули калоне мехаранд.
