Ҳукумати Тоҷикистон аз 12-уми июл соли ҷори сиёсати нави “Осмони боз”-ро роҳандозӣ кард, ки ба гуфтаи масъулон, боиси арзоншавии нархи чиптаҳои ҳавопаймоӣ ва афзоиши рақобат дар бозори парвозҳо хоҳад шуд.
Назарзода Ҳабибуллоҳ, директори Агентии авиатсияи граждании назди Ҳукумати Ҷумҳурии Тоҷикистон, рӯзи 23-уми июл дар нишасти матбуотӣ изҳор дошт, ки бар асоси сиёсати “Осмони боз” ба тамоми ширкатҳои ҳавопаймоии дохилӣ ва хориҷӣ тахфифҳои калон дода мешавад. Ба гуфтаи ӯ, ин иқдом метавонад ба 30 то 40 дарсад арзон шудани чиптаҳо сабаб шавад.
Ин суханони Ҳабибуллоҳ Назарзода дар ҳоле содаанд, ки дирӯз Лоиқ Бегиҷонзода, директори корхонаи “Тоҷикраэронавигатсия” ба расонаҳо гуфта буд, ки то соли 2024 танҳо ҳудуди 20-30 дарсад аз осмони Афғонистон ба рӯи ҳавопаймоҳои хориҷӣ боз буд ва ба ҳамин хотир аксари ширкатҳои ҳавопаймоӣ убур аз осмони Тоҷикистон беҳтар медонистанд, аммо дар соли ҷорӣ он маҳдудиятҳои пешин дар осмони Афғонистон пурра бартараф шуданд ва ба ин хотир убур аз осмони Тоҷикистон дигар барои ширкатҳои ҳавопаймоии хориҷӣ манфиатовар нест.
Фазои бози Афғонистон боис шуда, ки дар давоми 6 моҳи аввали соли ҷорӣ парвозҳои хориҷӣ аз осмони Тоҷикистон наздик ба 7 ҳазор адад кам гардида, 52 фоиз аз даромади корхонаи “Тоҷикаэронавигатсия” дар ин шашмоҳа кам шудааст.
Мақомоти тоҷик мегӯянд, ки қабули ин сиёсат ба мисли таҷрибаи кишварҳои дигар, дари бозорро ба ширкатҳои нав мекушояд ва ба коҳиши арзиши сафарҳо мусоидат мекунад.
Коидаҳои нави “осмони боз”, ба ширкатҳои хориҷии ҳавопаймоӣ имконият медиҳад, ки мустақилона ба шаҳрҳои Душанбе, Хуҷанд, Кӯлоб ва Бохтар парвозҳои худро анҷом диҳанд ва ҷадвали парвозҳои худро озодона тартиб намоянд.
Нархи гарони чиптаҳои ҳавопаймоӣ тайи солҳои охир борҳо мавриди шикояти мусофирон, бахусус муҳоҷирони корӣ, қарор гирифта буд. Муҳоҷирони тоҷик, ки асосан ба Русия равуо доранд, гаронии роҳкирои ҳавоӣ ва набуди рақобатро сабаби фишори молиявӣ медонанд.
Дар сурати татбиқи пурраи сиёсати “Осмони боз” ва имтиёз додан ба ширкатиҳо ҳавопаймоӣ то 40 дарсад арзон шудани чиптаҳо, як бори гарон аз дӯши муҳоҷирон бардошта мешавад, ки метавонад ба беҳтар шудани шароити сафар ва сарфаҷӯии маблағи онҳо кумак кунад.
