Раисҷумҳури Амрико Доналд Трамп шоми рӯзи чоршанбе аз расидан ба тавофуқи аввалии ҲАМОС ва Исроил дар Шарму Шайхи Миср хабар дод.
Ҳамзамон раҳбари сиёсии ҲАМОС Халил Ҳайя низ бо нашри изҳороте эълон кард, ки ба тавофуқи аввалӣ даст ёфтаанд ва бояд артиши Исроил фавран ҷангро хотима диҳад ва ба нуқтаи тавофуқшуда ақибнишинӣ кунад ва ҳамзамон дар давоми 72 соат асирони ду тараф озод карда шаванд.
ҲАМСО эълон карда, ки бо миёнҷигарии давлатҳои Амрико, Миср, Қатар ва Туркия тавонистанд ба тавофуқе бирасанд, ки ҷанг дар Ғазза пурра ва доимӣ хотима меёбад. Ин ҳаракат аз тарафҳои зомини сулҳ хост Исроилро барои татбиқ ва пойбанд буданд ба ин созишнома маҷбур созанд.
Субҳи имрӯз дафтари нахуствазири Исроил Бинёмин Натанёҳу хабар дода буд, ки зуҳри рӯзи панҷшанбе бо аъзои ҳукуматаш ҷаласа баргузор мекунад ва масъалаи созишномаро баррасӣ карда, соати оғози оташбасро эълон мекунад, аммо пас аз соате эълон кард, ки ҷаласаи аъзои ҳукуматш ба соати 5-и вақти маҳаллӣ ба таъхир гузошта шуд.
Мувофиқи ин созишнома, дар се марҳила артиши Исроил пурра аз Ғазза хориҷ мешавад. Дар марҳилаи аввал пас аз ихроҷи ҷузъӣ ҲАМОС якбора 20 асири зиндаро озод мекунад. Ва Исроил наздики 2000 фаластиниро, ки 250 нафарашон ҳукми абад доранд, озод мекунад. Аммо дар марҳилаи баъдӣ, ки бояд нерӯҳои сулҳи СММ вориди Ғазза шаванд ва Исроил боз ҳам ақибнишинӣ кунад, ҲАМОС ҷасади 22 асири мурдаро ба Исроил тавҳил медиҳад.
Гуфта мешавад, артиши Исроил ҳоло тақрибан 80% Ғаззаро зери тасарруфи худ даровардааст ва ба муҷарради эълони оташбас ба марҳилаи аввал ақибнишинӣ мекунанд, ки дар он сурат 53% Ғазза зери тасарруфашон хоҳад монд, аммо дар ду марҳилаи дигар пурра аз Ғазза хориҷ мешаванд.
Бино ба иттилои расонаҳои маҳаллӣ, дар лаҳзаҳои ахир ва пеш аз эълони оғози оташбас артиши Исроил ҳамлаҳои худро дар Хон-Юнус ва дигар манотиқи Ғазза шиддат бахшидааст, ки гуфта мешавад, танҳо дар Хон-Юнус аз субҳи имрӯз 15 нафар ҷон бохта ва даҳҳо нафари дигар захмӣ шудаанд.
Мувофиқи созишномаи имзошуда, пас аз эълони расмии оташбас маводҳои ғизоӣ ва кумакҳои башардӯстона фавран вориди Ғазза мешаванд ва барои аҳолӣ тақсим мегардад.
