Доналд Трамп, раисҷумҳури Амрико рӯзи душанбе тарҳи ҷадидеро барои оташбас ва поён додани ҷанг дар Ғазза пешниҳод кард.
Рӯзи душанбе Доланд Трамп бо Бинёмин Натанёҳу, нахуствазири Исроил дар Кохи Сафед мулоқот кард ва дар ҳузури хабарнигорон аз тарҳи ҷадиде дар бораи оташбас ва поён додани ҷанг дар Ғазза хабар дод, ки аз 20 банд иборат аст.
Мувофиқи ин тарҳ, ҲАМОС бояд ба таври куллӣ халъи силоҳ шавад ва аз қудрат дар Ғазза канор равад ва идораи ин борика ба дасти як кумитаи махсус аз текнократҳои ғайрисиёсии фаластинӣ ва коршиносони байналмилалӣ мегузарад. Ин кумита зери назари “Шӯрои сулҳ” бо раёсати худи Трамп, Тони Блэр ва дигарон фаъолият хоҳад кард.
Яке аз бандҳои дигари ин тарҳ ин аст, ки, пас аз пазируфтани оташбас аз ҷониби Исроил ва ҲАМОС дар ҳол ҷанг хотима меёбад Исроил аз нақшаи худ дар бораи ғасби Ғазза даст мекашад. Ва инчунин бояд дар давоми 72 соат ҲАМОС тамоми гаравгонҳои исроилӣ, чи мурда ва чи зиндаро ба Исроил бозгардонад. Пас аз озодии гаравгонҳои исроилӣ аз ҷониби ҲАМОС, Исроил 250 зиндонии фаластиниеро, ки ҳукми абад доранд ва инчунин 1700 нафари дигарро, ки баъд аз 7-уми октябри соли 2023 боздошт шудаанд, озод мекунад.
Бар асоси ин тарҳ, кумакҳои башардӯстона мувофиқи бандҳои оташбаси 19-уми январи ҳамин сол фавран вориди Ғазза мешаванд. Ва дар ҳол бозсозии зерсохторҳо, обрасониҳо, бемористонҳо, нонвойҳо ва макони омодасозии ғизо ва эҳтиёҷоти зарурӣ оғоз мегардад.
Вуруди кумакҳои башардӯстона аз тариқи Созмони Милали Муттаҳид, Ҳилоли Аҳмар ва дигар ниҳодҳои байналмилалӣ ва бидуни мудохилаи Исроил ва ҲАМОС анҷом мешавад. Инчунин гузаргоҳи “Рафаҳ” низ мувофиқи шартҳои тавофуқномаи моҳи январи соли 2025 бозгушоӣ мешавад.
Бар мабнои ин тарҳ, бояд бо назорати ниҳодҳои байналмилалӣ тамоми тунелҳои ҲАМОС тахриб шуда, раванди халъи силоҳи ҲАМОС ва дигар гурӯҳҳои муқовимат ба воситаи нозирони байналмилалӣ ва барномаи хариди силоҳ дунбол хоҳад шуд.
Гуфта мешавад, Натанёҳу дар ҳузури Трамп ба ин тарҳ розигии худро баён кард, вале имрӯз, сешанбе гуфт, ки артиши Исроил то комилан халъи силоҳ шудани нерӯҳои ҲАМОС дар Ғазза хоҳад монд. Ҳамзамон гурӯҳи Ҷиҳоди исломӣ ин тарҳро рад карда, онро як ҳиллаи аз байни бурдани муқовимат номид, аммо то ҳанӯз ҲАМОС дар ин маврид чизе нагуфтааст.
Бархе кишварҳои ғарбӣ ва арабӣ аз ин тарҳ истиқбол карда, бархе дигар онро талаи нави Трамп бар зидди ҲАМОС ва фаластиниён медонанд. Ҳатто баъзе аз расонаҳои фаронсавӣ ин тарҳро фурсати ҷадиде барои Исроил ва ҳатто иҷозати расмии ҳамлаи густурда алайҳи ҲАМОС унвон кардаанд.
