Расонаҳои Қирғизистон менависанд, ки дирӯз 22 феврал дар шаҳри Бодканди Ҷумҳурии Қирғизистон сокинон бо талаби раҳоии 5 боздоштшудаи қирғиз аз ҷониби КДАМ-и Тоҷикистон раҳпаймоӣ карданд.
Эътирозгарон барои мулоқот бо намояндаи Ҳукумати ин кишвар дар ин минтақа, Омурбек Суваналиев даъват карда шуданд.
Бино ба навиштаи хабаргузории қирғизии “24.kg”, рӯзи 16 феврал Кумитаи давлатии амнияти миллии Тоҷикистон панҷ шаҳрванди Қирғизистонро бо иттиҳоми убури ғайриқонунии марз боздошт кард. Се нафари онҳо зодагони ноҳияи Қадамҷай ва ду нафар аз Ботканд мебошанд. Пайвандони боздоштшудаҳо гуфтаанд, то ҳол маълум нест, ки онҳо дар куҷо нигаҳдорӣ мешаванд ва аз ҳолашон хабар надоранд.
“Онҳо аз бозори чорводории воқеъ дар қаламрави Тоҷикистон бармегаштанд ва дар роҳ боздошт шуданд. Аз ҷониби онҳо ягон қонуншиканӣ набуд. Дар байни онҳо маъюби гурӯҳи дуюм низ ҳаст. Мо намедонем, ки ӯ дар кадом ҳолат аст”, – гуфтанд наздикони боздоштшудаҳо ба хабаргузории қирғизии “24.kg”.
Ин дар ҳолест, ки то ҳол дар расонаҳои ҳукуматии Тоҷикистон аз боздошти шаҳрвандони Қирғизистон чизе нашр нашудааст ва шарҳи расмии ҷониби Тоҷикистон низ дар ин маврид дастрас нест.