Даҳҳо паноҳҷӯи афғон, ки ба Тоҷикистон гурехтанд, ҳоло дар як ҷазирае дар миёни Омӯдарё дармондаанд. Гуфта мешавад, онҳо дар минтақаи дахлнопазири марз қарор доранд.
Шабакаи “Орёно Нюз” бо нашри ин хабар мегӯяд, мақомоти тоҷик паноҳандагони афғонро ба кишварашон роҳ надоданд.
Дар навор дида мешавад, ки гурӯҳе аз муҳоҷирони афғонистонӣ, ки дар даште қарор доранд, мегӯянд, онҳо мехостанд ба Тоҷикистон паноҳ баранд, вале марзбонони тоҷик онҳоро ба як ҷазирае бурда гузоштаанд, ки ҳеч имконот надоранд.
Як зан дар ин навор мегӯяд, аз Созмони Миллали Муттаҳид ва ҷомеаи ҷаҳонӣ мехоҳем, ки ба доди мо бирасанд.
“Мо аз Афғонистон ба сӯи Тоҷикистон убур кардем, моро тоҷикон фиреб дода, гуфтанд, ки ба Тоҷикистон мебарем, мо ки 80 нафарем бо шумули тифлони ширхор дар саҳрои хушку холӣ оварда гузоштаанд. Аз се вақти хӯрок танҳо як вақт хӯрок медиҳанд”.
Паноҳҷӯёни афғон аз он шикоят доранд, ки кӯдакони хӯрди думоҳа ва семоҳаи ширхор доранд, кӯдаконашон шир барои хӯрдан надоранд, аммо касе ба доди онҳо намерасад.
Ин дар ҳолест, ки Рамазон Раҳимзода 1-уми сентябр дар Душанбе дар мулоқот бо Роҳбари Намояндагии Комиссари Олии Созмони Милали Муттаҳид дар умури паноҳандагон (UNHCR) Мулугета Зевди дар мавриди ин 80 паноҳҷӯи афғон бо шумули фарзандони худ, ки дар минтақаи дахлнопазири марз ҳастанд ва мехоҳанд вориди хоки Тоҷикистон шаванд, ишора карда гуфта буд, ки онҳоро Тоҷикистон қабул карда наметавонад.
Тоҷикистон далели қабул накардани паҳонҷӯёни афғонро дар надоштани бунёди зерсохтори паноҳгоҳ барои қабули муҳоҷирон ва таваҷҷӯҳ накардани созмонҳои байналмиллалӣ ба ин масъала маънидод карда буд.
