Дар Тоҷикистон дар нуҳ моҳи соли 2025 ба нафъи модарон ва кӯдакон тақрибан 150 миллион сомонӣ алимент ситонида шудааст.
Тибқи иттилои Хадамоти иҷрои назди Ҳукумати Ҷумҳурии Тоҷикистон, ин нишондиҳанда 126,5 миллион сомонӣ бештар нисбат ба ҳамин давраи соли гузашта мебошад.
Гуфта мешавад, айни замон дар Хадамоти иҷро наздик ба 98,9 ҳазор қарор оид ба ситонидани алимент қарор дорад. Ин ниҳод зикр карда, ки ситонидани мунтазами алимент яке аз чораҳои муҳим барои ҳифзи ҳуқуқи кӯдакон ва дастгирии оилаҳо ба шумор меравад.
Сардори Хадамоти иҷро Ахтам Абдуллозода, мегӯяд шахсоне, ки дар давоми ду моҳ маблағҳои муқарраршударо намепардозанд, ба руйхати қарздорони алиментӣ дохил карда мешаванд. Барои онҳо маҳдудиятҳо дар убури сарҳад ва дигар чораҳои таъсиррасон пешбинӣ шудаанд.
Хадамоти иҷро таъкид намуда, ки ҷорӣ намудани чунин тадбирҳо имкон медиҳад, ки ҳаҷми пардохтҳои алимент зиёд шуда, ҳуқуқи кӯдакон ба дастгирии молиявӣ таъмин гардад.
Ин дар ҳолест, ки рӯз то рӯз омори талоқ дар кишвар рӯ ба афзоиш аст ва ин масъала ба яке аз нигарониҳои ҷиддии ҷомеа табдил ёфтааст. Ба гуфтаи коршиносон, пас аз ҷудоии зану шавҳар, махсусан дар он оилаҳое, ки кӯдак доранд, бисёр вақт баҳсҳои додгоҳӣ барои ситонидани алимент ба миён меояд. Бо вуҷуди ин, дар ҳолатҳое, ки никоҳ расман сабт нашудааст, гирифтани алимент душвор ва тӯлонӣ мегардад, ки ин ҳуқуқи кӯдаконро ба дастгирии молиявӣ зери хатар мегузорад.
