Пеши роҳи фасод дар Вазорати маориф ва илм гирифта мешавад?

Рӯзи якуми октябр вакилони Маҷлиси намояндагон қарори Ҳукумати Ҷумҳури Тоҷикистонро дар бораи таъйини мудирони маорифи ноҳияҳо аз ҷониби Вазорати маориф ва илм, бо вуҷуди ҷой доштани баъзе камбудиҳо қабул намуданд.

То ин вақт мудирони маорифро дар Тоҷикистон раисони шаҳру ноҳияҳои таъйин ва барканор мекарданд, ки акнун ин салоҳият аз онҳо гирифта шуд.

Мухолифони қарор мегӯянд,  ки "ин иқдом метавонад боис ба бештар шудани омилҳои коррупсионӣ гардад", вале ҷонибдорон ин қарорро "назорат ва беҳтар кардани сифати таълим дар Тоҷикистон” номиданд.

Муҳаммаддовуд Саломиён, муовини аввали вазири маориф ва илми Тоҷикистон, дар порлумон гуфтааст, дар ин муддат "фаъолияти мудирони маориф аз назорат дур монда, боис ба таъйин гардидани шахсони тасодуфию бесалоҳият ва кам гардидани эътибори омӯзгорон дар ҷомеа шудааст."

Ба гуфтаи Саломиён "дар 26 шаҳру ноҳия, дар маҷмуъ, 28,2 дарсади сардорони сарраёсати маориф, раёсати маориф, мудирони шуъбаҳои маориф шахсоне таъин гардидаанд, ки фаъолияти пешинаашон умуман ба ин соҳа (маориф) рабт надорад".

Ба назари Саидҷафъар Усмонзода, вакили Маҷлиси намояндагон ва раиси Ҳизби демократ, додани ин салоҳият ба ихтиёри Вазорати маориф "кори дуруст нест". Ӯ мегӯяд: "чунин иқдом, баръакс, метавонад боис ба сар задани омилҳои коррупсионӣ гардад."

Пас аз баҳсу баррасиҳо лоиҳаи қонун "Дар бораи мақомоти маҳаллии ҳокимияти давлатӣ” бо ҷонибдории аксар вакилон қабул гардид.