Пирамарди 87-сола ба хотири кумак ба хонаводаҳои зиндониёни сиёсӣ ба 5 соли зиндон маҳкум шуд

Додгоҳи ноҳияи Исмоили Сомонӣ рӯзи 28-уми декабри соли 2020 собиқ аъзои ҲНИТ-ро, ки Донаёр Набиев ном дошта, 87 сол дорад ба 5 соли зиндон маҳкум кард. Ба гуфтаи наздиконаш ҳукми Набиеви 87 сола пушти дарҳои баста дар догоҳ хонда шуд. Масъулони додгоҳ дар ин бора шарҳе надодаанд.

Маҳмадӣ Тешаев собиқ раиси ҲНИТ дар н.Рудакӣ дар як паёми видеоии худ гуфт, ки Донаёр Набиевро ба хотири кумак ба зиндониёни сиёсӣ ба 5 соли зиндон маҳкум кардаанд. Чун парванда махфист, маълум нест расман ӯро бар асоси кадом моддаи Қонуни ҷиноӣ муттаҳам ва зиндонӣ кардаанд.

Дар идома Тешаев иброз доштааст, ки Набиев моҳи сентябри соли 2020 аз ҷониби КДАМ дар манзили зисташ воқеъ дар деҳаи Гулбӯтта, ҷамоати Чимтеппаи ноҳияи Рӯдакӣ боздошт шуд ва то замони эълони ҳукмаш, дар СИЗО-и шаҳри Душанбе зери фишорҳои шадиди рӯҳӣ нигаҳдорӣ мешуд ва охири моҳи декабр ба 5 соли зиндон маҳкум гардид.

Маҳмади Тешаев мегӯяд, ки Набиев Донаёр то манъи фаъолияти ҲНИТ дар Тоҷикистон масъули комиссияи тафтишотиии ин ҳизб дар ноҳияи Рӯдакӣ буд. Баъди манъи фаъолияти ҲНИТ аз ҷониби Ҳукумати Тоҷикистон дар дохили кишвар дар соли 2015, ин пирамард ҳеч фаъолияте дар ҲНИТ надошт ва дунболи зиндагӣ ва корҳои шахсии худ буд.

Ахиран Кумитаи шаҳрвандии наҷоти гаравгонҳо ва зиндониёни сиёсии Тоҷикистон (КШНГЗС) боздошти Набиеви 87-соларо маҳкум намуда, аз масъулони дахлдори Тоҷикистон тақозо кард, ки фавран ин пирамарди 87-соларо озод кунанд.

Ҳамчунин аз ҳамаи созмонҳои байналмилалии мудофеъи ҳуқуқи башар ва корпусҳои дипломатии фаъол дар Тоҷикистон умед дорад бетараф набошанд ва барои озодии ин пирамард тамоми талошу кӯшиши худро ба харҷ диҳанд.

Ёдовар мешавем, ки пештар аз ин барои кумак ба хонаводаҳои зиндониёни сиёсӣ писари Зубайдуллоҳи Розиқ, Асрориддин Розиқов ба 5 соли зиндон ва ду нафари дигар бо номи Муҳаммадии Соҳибнзар ва Баҳриддини Қурбон ба 6 солӣ зиндон маҳкум шуданд.

Дар пайи ин ҳодиса Юсупов Зайниддин, масъули бахши ҲНИТ дар н.Фархорро пас аз озод шудан боз ба як соли зиндон маҳкум кардаанд. Юусупов Зайниддинро ба он гунаҳгор донистаанд, ки ӯ аз Асрориддин Розиқов 200 доллар кумак гирифтааст.

Ӯ дар соли 2015 дар пайи парвандаи пурсарусадои ҲНИТ барои 10 сол паси панҷара рафт ва моҳи феврали соли гузашта ба озодӣ баромада буд.

Ҳамчунин Мазҳариддин Гадоевро баъд аз 4 моҳи озод шудан аз зиндон дигарбора боздошт намуда, ба 3 соли зиндон маҳкум кардаанд. Гадоев ҳанӯз соли 2015 дар пайи боздошти аъзоёни ҲНИТ барои 3 сол равонаи зиндон шуда буд. Вале баъд аз анҷоми муҳлат, бо сабабҳои номаълум ӯ 1 соли дигар дар зиндон нигоҳдорӣ шудааст.

Сабаби боздошти Гадоевро ба фаъолияташ дар солҳои 2010, ки имоми яке аз масҷидҳои ноҳияи Қубодиён будааст, рабт додаанд. Гуё ӯ дар масҷид ба наврасон дарси Қуръон медодааст. Ҳукми суди Мазҳариддин Гадоев дар додгоҳи шаҳри Бохтар хонда шудааст.

Ҳамин гуна чанде пеш дар Тоҷикистон Ҷалолиддини Маҳмуд узви собиқи Раёсати олии ҲНИТ-ро дубора барои 6 солу 8 моҳ равонаи зиндон карданд. Ӯ соле пеш бар асоси қонуни авф озод шуд.

Ҷалолиддин Маҳмуд моҳи феврали соли 2015 бо иттиҳоми ғайриқонунӣ нигоҳ доштани силоҳ дастгир ва ба 5 соли зиндон маҳкум шуда буд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.