Асроридин-яке аз писарони Зубайдуллоҳи Розиқ, узви Раёсати Олии ҲНИТ ва зиндонии сиёсии тоҷик тавассути кормандони КДАМ боздошт шудааст. Асрориддин дар ҳоле боздошт мешавад, ки падари 76-солаи ӯ Зубайдуллоҳи Розиқро ба ҳуҷраи ҷаримавии зиндон интиқол додаанд.
Ҳисомиддин Зубайдуллоҳ, яке дигар аз писарони Зубайдуллоҳи Розиқ, ки дар Аврупо паноҳанда аст, дар сафҳаи фейсбукии худ аз боздошти бародараш аз ҷониби кормнадони КДАМ ва интиқоли падараш ба ШИЗО хабар медиҳад.
Ба назари баъзе аз огаҳони умур ни ҳам пас аз фаъолшавии мухолифон дар шабакаҳои иҷтимоӣ, аз ҷумла суханрониҳои пайиҳами раиси ПМТ Муҳиддин Кабирӣ ва маъракаи талаби истеъфои Раҳмон, роҳандозишуда аз ҷониби пойгоҳи “Ислоҳ”, ки аз тарафи корбарони шабакаҳои иҷтимоӣ, мардум ва бахусус муҳоҷирони кории тоҷик дар Русия истиқболи густардаеро ба ҳамроҳ доштааст, фишор болои хонаводаи мухолифин, зиндониёни сиёсӣ ва фаъолони дохили кишвар аз нав шиддат гирифтааст.
Худи Ҳисомиддин мегӯяд, ки аз бародараш талаб кардаанд дар муқобили дастгоҳи наворбардорӣ ҲНИТ-ро террористӣ ва раису фаъолони онро хоину ватанфурӯш бихонад, аммо ӯ розӣ нашудааст. Ҳисомиддин мегӯяд, бародараш таҳти шиканҷаи шадид қарор дорад.
Озодӣ аз қавли бастагони ин хонавода навиштааст, ки Асрориддин Розиқови 38-сола, ки дар бозори “Корвон” ба фурӯши либосҳои кӯдакона машғул буда, рӯзи 26-уми июн дар роҳ ба сӯи бозор аз тарафи кормандони КДАМ боздошт шудааст.
То ин лаҳза Кумитаи давлатии амнияти миллии Тоҷикистон аз чунин боздоште хабар надодааст. Аъзои хонаводаи Розиқовҳо мегӯянд, “ҳеч сабабе барои боздошт вуҷуд надорад, магар ин ки бо мақсади фишор ба Зубайдуллоҳи Розиқ, ки, аз додани изҳороти телевизионӣ зидди раҳбарони ҳизб худдорӣ кардааст”.
Зубайдулллоҳи Розиқи 76-сола дар соли 2016 ба 25 соли зиндон маҳкум шудааст. Вай рӯзи 28-уми июн дар суҳбат бо наздиконаш гуфтааст, нозирони зиндон аз ҳуҷрааш китоби “Қуръон” ва маводи дезинфексия аз коронавирусро пайдо намуда, ӯро барои 5 рӯз ба ҳуҷраи ҷаримавӣ ё ШИЗО бурдаанд.
Тибқи иттилоъи манобеъи Паём ҳоло хонаводаи аксари фаъолони мухолиф таҳти фишори шадиди мақомот қарор доранд ва бештарашон ба идораҳои амнияту пулис эҳзор шуда, аз онҳо наворбардорӣ шудааст.
