Пулро намесупорӣ аз донишгоҳ ихроҷ мешавӣ!

Даҳҳо донишҷӯи донишгоҳҳои гуногуни Тоҷикистон гуфтаанд, ки ба хотири пардохт накардани маблағи донишгоҳ онҳоро ба имтиҳонҳои охири семестри якум роҳ наданд.

Донишҷӯён мегӯянд, ки бо сабабҳои гуногун имсол имкони пардохти пули таҳсилро надоранд, аммо ба гуфтаи масъулин ягона роҳи аз донишҷӯён гирифтани маблағ ин таҳдиди ихроҷи онҳо аз донишгоҳ аст.

Бино ба навиштаи Радиои Озодӣ, донишҷӯёни Донишгоҳи милли Тоҷикистон ва Коллеҷи тиббии шаҳри Кӯлоб шикоят намудаанд, ки ба хотири пардохт накардани пули шартномаи донишгоҳ аз тарафи масъулин ба имтиҳонҳо роҳ дода нашудаанд.

Гулчеҳра ном, сокини шаҳри Кӯлоб ва модари се донишҷӯйи Коллеҷи тиббии ин шаҳр мегӯяд, духтар, писар ва келинаш дар ин коллеҷ таҳсил мекунанд ва маблағи солонаи ҳар як онҳо 2400 сомонӣ мебошад, ки маҷмуан бояд 7200 сомонӣ пардохт кунад, вале ӯ ҳоло имкони пардохти ин маблағро надорад.

Ин сокин дар идома гуфтааст, ки худаш бемор асту шаҳвараш дар як моҳ 500 сомонӣ маош мегирад, ки ба гуфтаи ӯ ин маблағ ба харҷи рӯзгор нокифоя аст.

Зубайдулло Азиззода, мудири Коллеҷи тиббии шаҳри Кӯлоб ба Радиои Озодӣ гуфтааст, дар оғози соли таҳсил донишҷӯён нисфи маблағро супорида, ваъда дода буданд, ки боқимондаи онро то оғози имтиҳонҳо месупоранд, вале ба гуфтаи мудир ваъдаашонро иҷро накардаанд, маҷбур шуданд як қисми донишҷӯёнро ба имтиҳонҳо роҳ надиҳанд.

Танҳо донишҷӯёни Коллеҷи тиббӣ набудаанд, ки аз роҳ надодан ба имтиҳонҳо шикоят мекунанд, ҳамчунин чандин донишҷӯи Донишгоҳи миллии Тоҷикистон низ шикоят намудаанд, ки ба хотири пардохт накардани маблағи таҳсил ба имтиҳон роҳ наёфтаанд.

Дар ҳамин ҳол Насимҷон Абдулмуъминзода, муовини аввали раиси Донишгоҳи миллии Тоҷикистон ба Радиои Озодӣ, ин ҳолатро тасдиқ намуда, иброз доштааст, ки “ҳамин фишанг мондааст ва агар бо ин роҳ маблағро нагирем, дигар гирифта наметавонем. Донишҷӯ, ки маблағи шартномаро насупорад, чӣ хел маоши устодонро аз маблағҳои махсус пардохт кунем?”

Ин бори аввал нест, ки дар Тоҷикистон ба хотири пардохт накардани маблағ донишҷӯёнро ба имтиҳонҳо роҳ намедиҳанд, чанде пеш низ донишҷӯёни дигаре аз Хуҷанд ва Душанбе ба “Аздо тв” дар ин маврид шикоят карда буданд.

Баъд аз хуруҷи коронавирус ва баста гардидани марзҳо, ки бештари муҳоҷирон дар Тоҷикистон банд монданд, шикояти хонаводаҳо бештар шудааст. Чун ин қишри нонрасони хонаводаҳои тоҷик аз ҷои кор маҳрум шудааст ва дар кишвар кори муносибе надоранд, ки рӯзгори худро пеш баранд.

ИНЧУНИН БИХОНЕД:

Шартномаи таҳсилро бисупоред, вагарна аз Донишгоҳ ихроҷ мешавед!

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.