Президенти Русия Владимир Путин эҳтимоли аз байн бурдани низоми патентҳои корӣ барои муҳоҷиронро матраҳ кард.
Ӯ рӯзи 18-уми сентябр ҳангоми дидор бо роҳбарони фраксияҳои Думаи давлатӣ гуфт, ки масъалаи мазкур ҷиддан мавриди баррасӣ қарор дорад.
Ба гуфтаи Путин, мавзуи муҳоҷират дар ҷомеаи Русия ҳассос боқӣ мемонад ва ниҳодҳои давлатӣ наметавонанд аз мушкилот чашм пӯшанд. “Ҳамаи ин масъалаҳо воқеан вуҷуд доранд ва бояд роҳи ҳалли онҳо пайдо шавад”, — таъкид кардааст ӯ.
Ҳоло низоми патентӣ яке аз асосҳои қонунии фаъолият барои шаҳрвандони кишварҳои дорои режими бераводид ба шумор меравад. Барои гирифтани чунин иҷозатнома муҳоҷирон бояд пас аз вуруд ба Русия дар давоми 30 рӯз ҳуҷҷатҳоро расмӣ кунанд ва ҳар моҳ маблағи муайян пардозанд. Танҳо дар Маскав ҳаққи моҳонаи патент аз аввали соли ҷорӣ ба 8900 рубл баробар шудааст.
Соли ҷорӣ ҳамзамон талабот барои дарёфти патент сахттар шуда, аз ҷумла, қисми имтиҳонҳо дар бораи забони русӣ зиёд гардида ва ҳадди ками холҳои қабул муайян шудааст.
Путин қаблан имкон дода буд, ки муҳоҷирон дар баъзе аз минтақаҳои нав ба ҳайати Русия воридшуда, аз ҷумла Донетск ва Луганск, бе патент то охири соли 2025 кор кунанд.
Баъди изҳороти Владимир Путин дар бораи эҳтимоли бекор шудани низоми патентҳо, бархе аз коршиносони соҳаи ҳуқуқ ва иқтисод мегӯянд, ки чунин иқдом метавонад паёмадҳои гуногун дошта бошад.
Ба таъкиди онҳо, аз як тараф, бекор шудани патент метавонад хароҷоти муҳоҷиронро кам кунад ва равандҳои расмии корро осонтар намояд. Ин иқдом бахусус барои шаҳрвандони Тоҷикистон, ки қисми зиёди муҳоҷирони корӣ дар Русияро ташкил медиҳанд, сабукиҳо ба бор меорад.
Аммо аз тарафи дигар, эҳтимол меравад, ки ба ҷои патент шаклҳои дигари иҷозатнома ҷорӣ шаванд, ки боз ҳам бо санҷишу маҳдудиятҳои нав ҳамроҳ хоҳанд буд. Баъзе коршиносон мегӯянд, ки изҳороти Путин бештар хусусияти сиёсӣ ва ором сохтани ҷомеаи дохили Русияро дорад, на пешниҳоди воқеии тағйирот.
Ҳамзамон таъкид мешавад, ки ҳатто агар патент аз миён бардошта шавад, масъалаҳои асосии муҳоҷирон мисли муносибати ноадолатона, мушкилоти ҳуқуқӣ ва шароити вазнини корӣ боқӣ мемонанд.
