Вазири корҳои дохилии Тоҷикистон Рамазон Раҳимзода дар мулоқот бо ҳамтои итолиёияш Маттео Пянтедози масъалаи истирдоди шахсони дар ҷустуҷӯ қарордоштаро баррасӣ кардааст.
Мулоқоти вазирони корҳои дохилаи ду кишвар 23-уми апрел дар шаҳри Рум сурат гирифта, дар он ҳамзамон ҳамкориҳо дар самти пешгирӣ ва муборизаи босамар бар зидди терроризм, ифротгароӣ, ҷиноятҳои муташаккили фаромиллӣ, қочоқи маводи мухаддир, ҷиноятҳои киберӣ, мубодилаи иттилоот ва мусоидат ба таҳкими сулҳу субот дар Афғонистон баррасӣ гардидаанд.
Дар рафти мулоқот Раҳимзода иддао кардааст, ки “баъзе аз ҷинояткорон ба Аврупо, аз он ҷумла ба Ҷумҳурии Италия бо баҳонаи гирифтани паноҳандагӣ сафар карда пинҳон гаштаанд ва ҳамкории муштараки мақомоти ҳифзи ҳуқуқ метавонад барои ба ҷавобгарии ҷиноятӣ кашидани шахсони мазкур мусоидат намояд”.
Вазири тоҷик аз шахсони муайяне ном набурдааст, аммо ба кишварҳои аврупоӣ асосан мухолифони режими имрӯзаи Тоҷикистон паноҳ овардаанд ва мақомоти кишвар онҳоро барои танқид аз ҳукумат ҷинояткор медонад.
Инчунин гуфта мешавад, байни вазоратҳои дохилаи Тоҷикистон ва Италия дар соҳаи амниятӣ шартнома ба имзо расида, механизми дар амал татбиқ намудани он дар сафари вазири корҳои дохилии Италия ба Тоҷикистон баррасӣ хоҳад шуд. Аммо гуфта нашудааст кай вазири итолиёӣ ба Тоҷикистон меояд.
Ёдовар мешавем, ки Эмомалӣ Раҳмон аз рӯзи 22-уми апрел бо сафари расмӣ дар Италия қарор дорад. Зимни сафараш Раҳмонов бо президент ва сарвазири ин кишвар мулоқот карда, 7 санади нав ба имзо расондаанд.
Эмомалӣ Раҳмон дар ҳоле ба яке аз кишварҳои аврупоӣ ва демократӣ сафар кард, ки созмонҳои байналмилалии ҳуқуқи башар борҳоҳукумати Тоҷикистонро худкома номида, ӯро барои поймолкунии ҳуқуқу озодҳои мардум, набуди озодии баён ва вуҷуди садҳо зиндонии сиёсии дар кишвар, танқид мекунад.
Ҳамзамон мухолифони тоҷик пеш аз сафари ӯ ба ин кишвари аврупоӣ бо нашри изҳороте аз мақомоти Италия ва дигар кишварҳои Аврупо хоста буданд, ки президенти худкома ва диктаторро пешвоз нагиранд ва мисли дигар прездиентҳои кишварҳои ИДМ алайҳи ӯ низ таҳрим ҷорӣ кунанд.
