Собиқ раиси шаҳри Кӯлоб, Баҳром Иноятзода, ки соли 2020 бо иттиҳоми қаллобӣ ва порагирӣ ба 12 соли зиндон маҳкум шуда буд, озод шудааст.
Дар ин бора хабаргузории “Азия-Плюс” аз наздикони Иноятзода иттилоъ дод. Як манбаи дигар ба расона гуфта, ки Баҳром Иноятзода пеш аз муҳлат шартан озод шудааст ва бояд зуд-зуд рафта ба мақомот аз худ ва ҷои истиқоматаш хабар диҳад.
Ин дар ҳолест, ки Додгоҳи минтақаи Кӯлоб 20-уми ноябри соли 2020 Баҳром Иноятзодаро бо 6 модда, аз ҷумла моддаҳои 314 қ.2, 319 к.4, б. «а,в,г», 245 қ.2, б. «а,б,ғ», 247 қ.4, б. «б», 3381 К. 2, б. «в» , 262 қ.З, «б» КҶ ҶТ ба 12 соли зиндон маҳкум кард. Ӯро ба суистифода аз мансаб ва ҷиноятҳои дигар гунаҳкор дониста буд.
Баъдан, моҳи январи соли 2021 Додситонии кулли кишвар нисбати Баҳром Иноятзода иттиҳоми нав эълон кард. Ин бор ӯро ба он муттаҳам карданд, ки гӯё “беш 2 миллион сомониро бо роҳи ҷиноят ба даст оварда” барои худ бунгоҳи шахсии тиббӣ сохтааст.
Он замон Додситонии кул дар сомонаи расмияш навишт, ки: “Иноятзода Баҳром аз 6 майи соли 2019 дар вазифаи иҷрокунанда ва минбаъд раиси шаҳри Кӯлоб фаъолият карда, бо сӯистифода аз ваколатҳои мансабӣ ба иҷрои корҳои сохтмонии МИХД шаҳри Кӯлоб ғайриқонунӣ аз ҷониби гуруҳи ашхос аз 13 нафар сокинони шаҳр маблағҳои пулӣ ба сифати пора гирифта, бо роҳи содир кардани ҷиноятҳои азонихудкунӣ даст ба тасарруфи маҳсулотҳои хайриявӣ ва бо роҳи фиреб даст ба тасарруфи амволҳои шаҳрвандон зада, бараъло бо роҳи ҷиноят даромад ба даст овардааст”.
Додситонӣ гуфта буд, ки “Иноятзода Б. бо мақсади рӯйпуш ва пинҳон намудани сарчашмаи ба даст овардани маблағҳое, ки бо роҳи ҷиноят ба даст овардааст, дар ҷои манзили истиқоматиаш, воқеъ дар шаҳри Кӯлоб, кӯчаи Р.Абдушукурова, хонаи №28 Маркази тиббии хусусӣ ба маблағи 2 317 994 сомонӣ бунёд кардааст.”
Худи Иноятзода ва наздиконаш дар пайи зиндонӣ шудани ӯ аз ҳукми додгоҳ норозӣ буданд. Он замон ҳамсари Иноятзода ба расонаҳо гуфта буд, ки шавҳараш 37 соли умри худро сарфи корҳои давлатӣ кард натиҷааш 12 сол паси панҷара шуд.
Иноятзода дар мансабҳои раиси шаҳри Истаравшан, вакили Маҷлиси миллӣ ва раиси шаҳри Кӯлоб фаъолият кардааст. Замони раиси шаҳри Истаравшан фаъолият карданаш, бо адешаҳои зидду нақизаш нисбати диндорон дар ҷомеа шинохта шуда буд. Ӯ он замон гуфта буд, нафароне, ки ба масҷид мераванд бо ақидаи солим берун намеоянд.
Иноятзода моҳи феврали соли 2019 моликони ширкати “Комил-2010”, мансуб ба писари Бег Сабур, собиқ раиси Хадамоти алоқа ва қудои президенти Тоҷикистонро танқид карда буд. Ҳамчунин ӯ Бег Сабурро ба хотири пардохт накардани қарзҳои давлатӣ “Хоҷа Аҳрори Валӣ” ном ниҳода буд, ки баъзе коршиносон ва ҳамтто корбарон дар шабакаҳои иҷтимоӣ дастгир ва зиндонӣ шуданашро натиҷаи он танқиди сахташ аз қудои раисҷумҳур дониста буданд.
