Раиси КДАМ-и Тоҷикистон ба Кобул сафар кард

Раиси Кумитаи давлатии Амнияти миллии Тоҷикистон Саймумин Ятимов ба Афғонистон сафар карда бо раиси Шӯрои олии мусолиҳаи миллии ин кишвар Абдулло Абдулло дар дафтари корияш Қасри Сапедор дидору гуфтугӯ намуд.

Дар бораи сафари ин мақомдори баландпояи Тоҷикистон расонаҳои ҳукуматӣ чизе нашр накардаанд. Аммо Шӯрои олии мусолиҳаи миллии Афғонистон дар саҳифаи фейсбукияш дар ин бора хабар додааст.

Гуфта мешавад, Ятимов рӯзи якшанбе ба кишвари ҳамсоя сафар намуда, зимни мулоқот бо Абдулло Абдулло дар бораи талошҳои сулҳи Афғонистон ва вазъияти амниятии ин кишвар гуфтугӯ доштаанд.

Аксҳо: Фейсбук, Dr.Abdullah Abdullah

“Дар ин дидор ду тараф дар бораи талошҳои сулҳ, таҳаввулоти охири музокироти Давҳа, вазъияти амниятӣ, равобити дуҷонибаи миёни ду кишвар ва авзоъи марзӣ миёни Ҷумҳурии исломии Афғонистон ва Ҷумҳурии Тоҷикистон баҳсу табодули назар карданд”, омадааст дар хабари дафтари матбуотии Шӯрои мусолиҳаи миллии Афғонистон.

Инчунин гуфта мешавад, ки Абдулло Абдулло барои ҷонибдории Эмомалӣ Раҳмон ва сулҳи Афғонистон изҳори сипос намуда, бар идомаи ҳимоятҳо ва дастёфтани минтақа ба сулҳи доимӣ таъкид доштааст.

Сафари Ятимов ба Афғонистон дар ҳоле сурат мегирад, ки рӯзи 11 феврали соли равон Эмомалӣ Раҳмон бо Ашарф Ғанӣ раисҷумҳури Афғонистон сӯҳбати телефонӣ анҷом дода буд.

Гуфта мешуд, ки дар сӯҳбати раисони ду кишвар масъалаи сулҳи байниафғонӣ ва вазъияти амниятии кишвари ҳимсоя баҳсу баррасӣ гардид. Ва Эмомалӣ Раҳмон пуштибонии худро аз сулҳи байниафғонӣ изҳор дошта, таъкид бар он намуда, ки Тоҷикистон аз талошҳои Ҳукумати Афғонистон барои расидан ба сулҳу субот дар ин кишвар ҳамеша пуштибонӣ мекунад.

Ҳамчунин Саймумин Ятимов 10 сентябри соли гузашта низ як сафаре ба Афғонистон дошт, ки дар аввал расонаҳои ҳукуматии Тоҷикистон онро нашр накарда буданд.

Аз чап Саймумин Ятимов ва аз рост Абдулло Абдулло

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.