Раҳмон барои бозгардонидани мутахассисони тоҷик аз хориҷ таъкид кард

Эмомалӣ Раҳмон раисҷумҳури Тоҷикистон ба вазири маориф ва раиси Дафтари раёсатҷумҳурӣ дастур дода, ки раванди бозгардонидани мутахассисони тоҷик аз хориҷро ба таври ҷиддӣ пайгирӣ кунанд.

Тибқи гузориши хабаргузории "Спутник" Эмомалӣ Раҳмон ба Муҳаммадюсуф Эмомзода ва духтараш Озода Раҳмон дастур дода, ки мавзӯи бозгардонидани мутахассисони тоҷик аз хориҷ ва таъмини шуғли ин афрод дар дохилро дар дастури кор қарор бидиҳанд.

Раисҷумҳур гуфт ҷавононе, ки бо барномаи "истеъдодҳои дурахшон"-и ҳукумат ва саҳмия (квота)-и Тоҷикистон дар кишварҳои хориҷӣ таҳсил мекунанд ба кишвар барнамегарданд ва иллати ин вазъ тангназарии мақомоти масъул аст, ки тавони дидани нерӯҳои қавитар аз худро надоранд.

Раҳмон изофа кард, ки зарур аст мутахассисони бо истеъдоде, ки дар хориҷ улуми мухталифро фаро гирифтаанд ва кишвар ба онҳо ниёз дорад ҷойгузини афроде шаванд, ки дар роҳи ба кор қабул кардани онҳо монеа эҷод мекунанд.

Ба гуфтаи Раҳмон намунаҳои зиёде вуҷуд дорад, ки донишомӯхтагони хориҷ ба Тоҷикистон омаданд, вале шуғли муносиб барои онҳо таъмин нашуда аст. Ва онҳо дигарбора ба хориҷ баргаштаанд. Ин дар ҳоле аст, ки мо заминаи омӯзиши мутахассисони касбиро дар дохили кишвар надорем.

Ҳамасола ҳазорон нафар аз донишандӯхтагони марказҳои омӯзишии хориҷӣ ба далели набуди шуғли муносиб ва маоши кофӣ мондан дар кишварҳои дигарро бар бозгашт ба ватан афзал мешуморанд.