Раисҷумҳури Тоҷикистон Эмомалӣ Раҳмон 27-уми январ бо судури фаромне раиси ширкати “Барқи тоҷик” Мирзо Исмоилзодаро аз вазифааш барканор кард. Дар ин бора Хадамоти матбуоти Президент хабар медиҳад.
Курсии Исмоилзоаро кӣ соҳиб шудааст, ҳоло номаш маълум нест, аммо дар хабар гуфта мешавад, ки раис ва муовинони ширкати “Барқи тоҷик” аз ҳисоби мутахассисони “соҳибтаҷрибаву кордон” таъин гардидаанд.
Мирзо Исмоилзода аз моҳи августи соли 2015 дар вазифаи раиси ширкати “Барқи тоҷик” кор мекард.
Ширкати “Барқи тоҷик” дар Тоҷикистон ягона ширкати барқрасоне маҳсуб мешавад, ки ба ҷуз ВМКБ тамоми кишварро бо барқ таъмин мекунад. Ин ниҳоди давлатӣ аз нерӯгоҳҳои “Сангтӯда-1” ва “Сангтӯда-2”, аз конҳои ангишт, андоз ва ғайра миллиардҳо сомонӣ қарздор аст. Ин аст, ки аз сӯи коршиносон ба хотири реша давондани фасод дар сатҳи болои ин ширкат ҳамеша мавриди интиқод қарор гирифтааст.
Ба назари коршиносон тағйироти кадрӣ дар ширкати “Барқи тоҷик” чандон дар кори он таъсир намерасонад, чун ҳар масъуле, ки меояд ин ширкат дар қарз ва буҳрони молӣ фурӯтар меравад.
