Иддае аз шаҳрвандони кишварҳои арабии ҳамсояи Фаластин пас аз нoумед шудани ҳокимони кишварҳои худ дар ирсоли кумакҳои инсонӣ ба сокинони қаҳтзадаи Навори Ғазза иқдоми ҷадидеро рӯи даст гирифтаанд.
Ин иқдом, ки аз ҷониби хеле аз сокинон ва озодагони кишварҳои ҳавзаи баҳри миёназамин бо истиқболи гарм рӯбарӯ шудааст, иборат аз он аст, ки мардум бо истифода аз зарфҳои палостикӣ қасди кумак кардан ба мардуми Ғаззаро пешниҳод кардаанд.
Касоне, ки ин иқдомро рӯи даст гирифтаанд ва ё онро дар шабакаҳои иҷтимоӣ таблиғ мекунанд, дар даруни зарфҳои палостикӣ маводҳои хӯрока ва баъзе донагиҳои гуногунеро аз қабили гандуму биринҷ, наску нахуд ва ғайра пур карда, даҳони онҳоро муҳкам мебанданд ва сипас бо умеди он, ки мавҷи обҳо онҳоро ба обҳои Фаластин интиқол медиҳанд ва сокинони қаҳтзадаи Навори Ғазза аз соҳили баҳр онҳоро дарёфт хоҳанд кард, ба баҳр мепартоянд.
Иқдоми мазкур тоза шурӯъ шуда, дар бархе сафҳаҳои пурхонандаи шабакаҳои иҷтимоӣ хеле зиёд таблиғ мешавад, аммо то кунун иттилоъ дар бораи он, ки чунин кумакҳоеро сокинони Навори Ғазза аз соҳилҳои баҳри миёназамин дарёфт кардаанд ё на, то ҳол чунин хабаре тасдиқ нашудааст.
Гуфтанист, созмонҳои кумакрасон дар Навори Ғаззаи Фаластин мегӯянд, ки аз ҳар 5 нафар тифли дар ин мантақа яке аз онҳо ба бемориҳои масбуб ба норасоии ғизои солим гирифтор мебошанд ва барои камтар кардани сатҳи қаҳтӣ ҳафтае бояд дасти кам 500 ҳазор халтаи орд ворид карда шавад. Аммо он чӣ аз кумакҳои инсонӣ ин шабу рӯзҳои Ғазза фиристода мешавад, баробар 1 дарсад аз талаботи мардум дар рӯз мебошад.
Дар ҳамин ҳол бархе созмонҳои кумакрасон хостори таъсиси фаврии як каридори гуманитарӣ шудаанд, то кӯмакҳои башардӯстона ба таври амн ва босуръат ба мардуми Ғазза расонида шаванд. Онҳо таъкид карданд, ки ҷилавгирӣ аз вуруди кӯмакҳо ҳамчун як шакли ҷангӣ алайҳи шаҳрвандон мулкӣ метавонад ҳамчун ҷинояти ҷангӣ арзёбӣ шавад.
Ҳамзамон беш аз 30 кишвари дигар, аз ҷумла Бритонияи Кабир, Ҷопон ва Фаронса ва ғайра низ бо нашри як изҳороти расмӣ аз мақомоти исроилӣ хоста буданд, ки роҳи вуруди кумакҳои инсонӣ, аз ҷумла маводи хӯрока ва дорувориро бидуни қайду шарт ба Навори Ғазза боз кунад, аммо Тел-авив ба ин ҳама дархостҳо то ҳол посухи мусбат надодааст.
