Даҳҳо нафар аз сокинони ноҳияи Дарвози Вилояти Мухтори Кӯҳистони Бадахшон бо шиорҳои мухталиф ба кӯча баромада, дар маркази ноҳия роҳпаймоӣ баргузор кардаанд.
Бино ба иттилои расмӣ субҳи дирӯз, 25-уми апрели соли 2023 дар ноҳияи Дарвоз ҷамъе аз “сардорони идораю муассисаҳои ноҳия, ҷавонон, сокинони касбу кори гуногун ва хонандагону омӯзгорон” дастаҷамъона раҳпаймоӣ баргузор карданд.
Дар аксу наворҳое, ки аз ин рафти роҳпаймоӣ ба шабакаҳои иҷтимоӣ роҳ ёфтаанд, дида мешавад, иштироккунандагон дар даст аксҳое аз Эмомалӣ Раҳмон ва Парчами миллиро доранд. Ба гуфтаи корбарон, аксари онҳо бо супоириши иҷборӣ ба ин роҳпаймоӣ ҳамроҳ шудаанд.
Масъулин ҳадафи аслӣ аз баргузории ин роҳпаймоӣ дар ин ноҳияи дурдастро “саҳми беназири Эмомалӣ Раҳмон” дар обод кардани ВМКБ ва бахусус ин ноҳия гуфтаанд. Вале яке аз ширкаткунандаҳои ин роҳпаймоӣ (номаш ба далоили амнӣ фош намешавад) дар суҳбат Azda tv гуфт, “масъулин ҳарчи мегӯянд, вале ҳадафи ман ва чанд нафари дигаре, ки онҳоро мешиносам, таҷриба касб кардан дар чунин корҳои ҷамъиятӣ ва пайдо кардани делели муҳкам барои баргузор кардани роҳпаймоиҳои эътирозӣ дар оянда аст.”
Ба гуфтаи ӯ, дуруст аст, ки симои ноҳия дигар шудаву теъдоди биноҳои замонавӣ зиёдтар, “вале бовар кунед, дар ин ноҳия рӯз то рӯз муносибати мақомот бо мардум бадтар ва ҳалқаҳои фишорҳо тангтар шудааст. Аз як тараф, барои ҷалб кардан ба сафи Қувваҳои муссалаҳ фишор меоранд ва аз тарафи дигар барои нигоҳубини гову гусафандҳо.”
Ҳамчунин манбаъ бо ибрози нигаронӣ меафзояд: “Дар асл ҳамин Эмомалӣ Раҳмон буд, ки чанде қабл бо чанд “тангаи сиёҳ” беш аз як ҳазор километри муррабаъ аз хоки ин сарзаминро ба Чин фурӯхт. Вале бо гузашти ин ҳама солҳо то ҳол 10 нафар аз масъулин пайдо нашуда, ки як бор дастаҷамъӣ садо баланд карда гӯянд, ки чаро қисме аз сарзамини моро фурӯхтӣ?”
Бархе коршиносон мегӯянд, агар бойгариҳои зеризаминӣ ва рӯйизаминии ин вилоят аз ҷониби мақомоти кишвар бо роҳҳои дуздиву чаповул ғорат нашаванд, бо харҷи 10% аз даромади ин бойгариҳо ба нафъи ин вилоят зарфи 4 сол зиндагии сокинон ба куллӣ фарқ мекунад ва онҳо шоҳона зиндагӣ мекунанд, вале чунин кореро анҷом намедиҳанд.
