Роҳи расидани муҳоҷирон аз Беларус то Литва

Хадамоти марзбонии Литва мегӯяд, шумораи муҳоҷирон аз Шарқи Наздик ва Африқо, ва кишварҳои Осиёи Марказӣ, ки аз тариқи Беларус ба Литва омадаанд, 20 баробар зиёд шудааст.

Ба гуфтаи мақомоти Литва, аз аввали соли ҷорӣ дар марзи Литва ва Беларус беш аз 1700 муҳоҷири ғайриқонуниро, ки асосан аз кишварҳои Африқо, Осиё ва бахусус кишварҳои Осиёи Марказӣ аз ҷумла Тоҷикистон ҳастанд, боздошт кардаанд.

Дар аввали моҳи июл ҳукумати Литва дар робита ба бӯҳрони муҳоҷират дар ин кишвар вазъияти фавқулодда эълон кард. Мақомоти Вилнюс иддаъо доранд сохторҳое, ки ба интиқоли қочоқи ғайриқонунии муҳоҷирон машғуланд, таҳти сарпарастии мақомоти Беларус қарор доранд.

Бино ба гузориши "Евронюс", Арвидас Анушаускас, вазири мудофиаи Литва гуфтааст, ташкилкунандагони муҳоҷирати ғайриқонунӣ муҳоҷиронро раҳнамоӣ мекунанд, то онҳо худро ба марзҳо расонанд. Вай афзуда, мувофиқи он роҳнамоиҳо худи муҳоҷирон таъкид доранд қочоқбарон онҳоро мефаҳмонанд, ки ҳангоми бозпурсӣ дар сарҳад чӣ гуна рафтор кунанд, ҳуҷҷатҳояшонро нобуд ва чӣ бигӯянду чӣ нагӯянд.  

Муҳоҷирони боздоштшуда аз кишварҳои Осиё ва Африқо мегӯянд, одамон бо либоси "камуфляж" ва ниқобпӯш моро то омадан ба марзи Литва дар ивази маблағ раҳнамоӣ карданд.

Сурат: lrt.lt / Ҳангоми боздошт дар марз аз ҷониби сарҳадбонони Литва 

Мустафо Ҳусейн, муҳоҷир аз Ироқ: "Ман аз Бағдод омадам. Ба гурӯҳи сайёҳон дар Минск ба як нафар 1400 доллар додам, то маро ба ҷангал барад. Ба гумонам, ин марз буд. Онҳо ба ман роҳ нишон доданд ва ба ман гуфтанд, ана ҳаминхел рав ва ман рафтам."

Ҳайдар ал-Гаравг, муҳоҷир аз Ироқ: "Ман 1500 доллар сарф кардам. Хостем, ки аз ҷангал гузарем, аммо дар ботлоқе дармондем, ки об то камар буд. Ба ҳар ҳол мерафтем. Рафтан душвор буд. Мо бо ҳайвоноти ваҳшӣ рӯ бу рӯ мешудем хеле хатарнок. Фикр мекардам, ки дар ин ҷангал мемирем. Аммо, Худоро шукр, ки ӯ моро наҷот дод ва ба мо имкон дод, ки ба ин ҷо биёем."

Ҷесс, муҳоҷир аз Камерун: "Ман аз ВАО фаҳмидам, ки мардум ба ин ҷо меоянд, фикр кардам, ки марз кушода аст ва ба қароре омадам, ки фурсатест бояд онро истифода барам."

Дар яке аз нуқтаҳои ҷойгиршавии гурезагон дар Литва

Светлана Тихановская, раҳбари мухолифони Беларус роҷеъ ба ин мегӯяд, "Мусаллам аст, ки ин кӯшиши режим (Лукашенко) барои интиқом аз Литва ва тамоми Иттиҳоди Аврупо барои пуштибонии ҷомеаи шаҳрвандии Беларус аст."

Ин ҳам дар ҳолест, ки охири моҳи май президенти Беларус, Александр Лукашенко таҳдид кард, ки назоратро бар болои қочоқ ва муҳоҷирати ғайриқонунӣ дар робита ба фишори Арвупо ба Минск (пас аз ҳодисаи ҳавопаймои “Ryanair”) суст мекунад. "Мо назоратро бар болои қочоқ ва муҳоҷирон қатъ кардем, акнун шумо худатон онҳоро боздоред", гуфта буд Лукашенко.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.