27-уми январи соли ҷорӣ духтари Раисиҷумҳур Эмомалӣ Раҳмон, Рухшонаи Эмомалӣ бо вазири Дафтари корҳои хориҷӣ, Иттиҳод ва рушди Подшоҳии Муттаҳидаи Британияи Кабир ва Ирландияи Шимолӣ Лорд Ториқ Аҳмад мулоқот намудааст.
Бино ба иттилои Вазорати корҳои хориҷаи Тоҷикистон, зимни вохӯрӣ ҷонибҳо масъалаҳои ҳамкориҳои дуҷонибаи Тоҷикистон ва Британияи Кабирро дар соҳаҳои гуногун мавриди баррасӣ қарор додаанд.
Инчунин ҷонибҳо атрофи масъалаҳои муҳимми минтақавӣ ва байналмилалӣ ибрози назар кардаанд.
Ёдовар мешавем, ки Рухшонаи Эмомалӣ бо фармони падараш Эмомалӣ Раҳмон моҳи декабри соли гузашта, Сафири Фавқулода ва Мухтори Ҷумҳурии Тоҷикистон дар Подшоҳии Муттаҳидаи Британияи Кабир ва Ирландияи Шимолӣ таъйин гардида буд.
Рухшонаи Эмомалӣ то таъйин шуданаш ба ин мансаб, ба ҳайси ноиби сардори Раёсати созмонҳои байналмилалии ВКХ-и Тоҷикистон ва дар намояндагии Тоҷикистон дар Бритониё низ кор кардааст.
Рухшонаи Эмомалӣ ҳамсари Шамсулло Соҳибов, раиси ширкати “Фароз” мебошад.
