Русия дар Тоҷикистон бо 30 млн доллар мактабҳои русӣ месозад

Русия барои таъмир ва сохтмонҳои мактабҳои русӣ дар Тоҷикистон 30 милиион доллар ҷудо кардааст. Ин маблағҳо барои сохтмону таъминоти молиявӣ ва техникии муассисаҳои таълимӣ, ки таҳсилот дар онҳо ба забони русӣ роҳандозӣ шудааст, равона мегардад.

Бино ба иттилои сомонаи маълумоти ҳуқуқии Русия, Михаил Мишустин сарвазири Русия қарори ҷудо гардидани 30 миллион доллларро имзо намуда ба Вазорати умури хориҷаи Русия дастур додааст, ки Ҳукумати Тоҷикистонро дар ин бора хабардор кунад.

Ҳамчунин гуфта мешавад, ки Вазорати молия бо “Бунёди устуворшавӣ ва рушди АвруОсиё” тартиби гузаронидани маблағ, инчунин пардохти ин маблағ аз буҷаи давлати Русияро таъмин мекунанад.

Дар назар аст, аз ин маблағ қисми аввали он дар ҳаҷми 3 миллион доллар бояд то охири ҳамин сол тақдим гардад. Қисми дуввуми он дар ҳаҷми 27 миллион доллар дар соли 2021 ҷудо карда мешавад.

Дар қарор ҳамчунин зикр гардидааст, ки ин маблағҳо ба мактабҳо дар пойтахти Тоҷикистон шаҳри Душанбе, Кӯлоб, Хуҷанд, Бохтар ва Турсунзода дода мешаванд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.