Русия мехоҳад қонуни ҷадидеро дар бораи муҳоҷират таҳия кунад, ки тибқи он ҳолатҳои вуруд, будубош ва дигар умури муҳоҷиронро ба шакли дигар танзим кунад.
Муовини сардори Сарраёсати Вазорати корҳои дохилии Русия оид ба масъалаҳои муҳоҷират, Кирилл Адзинов эълон кард, ки қонуни нав дар соҳаи муҳоҷират, ки ҳоло дар Русия таҳия мешавад, метавонад аз соли 2024 эътибор пайдо кунад.
Бино ба маълумоти РИА Новости, Кирилл Адзинов гуфт, қонуни нав дар соҳаи муҳоҷират аз соли 2024 эътибор пайдо мекунад, ва он масъалаҳои вуруд, будубош ва фаъолияти меҳнатии муҳоҷиронро ба танзим медарорад.
"Мо қонуни калонеро менависем, ки қоидаҳои қаблиро дар соҳаи муҳоҷират ба куллӣ тағйир медиҳад. Он ба қоидаҳои дахлдор марбут ба вуруд, будубошу кори муҳоҷирон таъсир мерасонад ва боиси бекор кардани як қатор санадҳое мегардад, ки ҳоло амал мекунанд. Тибқи нақшаҳо, ин қонун бояд аз соли 2024 эътибор пайдо кунад,"- мегӯяд муовини сардори Сарраёсати ВКД-и Русия оид ба масъалаҳои муҳоҷират Кирилл Адзинов.
Инчунин Адзинов афзуд, ки ду намуди вуруд ба Русия вуҷуд хоҳад дошт: раводид ва бидуни раводид. Қарор аст, як санаде ҷорӣ карда шавад, ки он ҳама ҳуҷҷатҳоеро, ки ҳоло барои муҳоҷирон тартиб дода мешаванд, иваз кунад. Ҳамчунин ва аз ҷумла, мушаххас кардани қоидаҳои расонидани кумаки тиббӣ ба муҳоҷирони меҳнатӣ дар доираи суғуртаи ҳатмии тиббӣ ва гирифтани раводиди тиббӣ дар назар хоҳад буд.
Қаблан гузориш шуда буд, ки муҳоҷироне, ки дар қаламрави Русия қарор доранд, бояд ҳуҷҷати ягона бо интиқолдиҳандаи электронӣ дошта бошанд, ки он дар дохили кишвар ҳамчун шиносномаи шахсият хидмат кунад ва барои гирифтани он муҳоҷирон бояд ба мақомоти иҷроияи федеролӣ дар соҳаи корҳои дохилӣ ариза пешниҳод кунанд, инчунин аз санҷиши биометрӣ гузаранд.
