Мақомоти тафтишотии Русия мегӯянд, то ҳол дар иртибот бо ҳамлаи “Крокус Сити Ҳолл”-и Маскав 27 нафар гумонбар шудаанд.
Дар ин бора Александр Бастрикин, раҳбари Кумитаи тафтишоти Русия дар мусоҳиба бо “Российская газета” гуфтааст.
Ин масъули Кумитаи тафтишотӣ инчунин изҳор дошт, ки “таҳқиқот дар бораи афроди дигаре, ки эҳтимол дар омодасизӣ барномарезӣ ва маблағгузории ин ҳамлаи террористӣ даст дошта бошанд, идома дорад. Иртиботи миёни муттаҳамон тавассути марказҳои ягонаи ҷамъоварии маблағ ошкор ва мавриди санҷиш қарор гирифтаанд”.
Ӯ дар мусоҳибааш ҳамчунин афзуда, ки дар соли 2024, 293 парвандаи ҷиноятҳои дорои хусусияти террористӣ ба додгоҳ ирсол гардида, аз ин 36 парванда марбут ба маблағгузории терроризм будааст.
Ёдовар мешавем, ки шоми 22-уми марти соли 2024 ба бинои “Крокус Сити Ҳолл”-и шаҳри Красногорски Маскав ҳамла сурат гирифта, муҳоҷимон сӯи мардум аз автоматҳо тир кушоданд. Пас аз чанде толори консертӣ оташ гирифт. Бино ба иттилои расмӣ, дар натиҷаи тирпарронӣ ва сар задани оташ 143 нафар, аз ҷумла се кӯдак ба ҳалокат расида, 182 нафари дигар ҷароҳат бардоштаанд.
Мақомоти Русия дар пайи ин ҳодиса чандин нафарро боздошт кард, ки аксари онҳо зодагони Тоҷикистон мебошанд. Аз ҷумла, чаҳор шаҳрванди Тоҷикистон Муҳаммадсобир Файзов, Далерҷон Мирзоев, Саидакрам Раҷабализода ва Фаридун Шамсидин ҳамчун гумонбаронии ассои ин ҳамла дониста шуданд.
Ба гуфтаи худи муҳоҷирони кории тоҷик, маҳз пас аз ин ҳодиса санҷишу боздошт ва ихроҷи иҷбории тоҷикон афзуда, муносибати мардуму корфармоён бо онҳо тағйир ёфт. Инчунин мардуми оддӣ мавриди ҳамлаҳои лафзӣ ва ҷисмӣ аз ҷониби полис қарор гирифта, ихроҷи муҳоҷирон тоҷик ба ҳар далел бештар шуд.
Дар моҳои охири соли гузашта чанд тарҳи нави қонунҳое дар Русия пешниҳод ва қабул гардиданд, ки кор дар соҳаҳои гуногун барои муҳоҷиронро маҳдуд ва вазъи онҳо дар ин кишварро мушкилтар мекунанд.
