Субҳи имрӯз яке аз бузургтарин бозорҳои шаҳри Маскав, пойтахти Русия, ки аксари тоҷирону кормандони онро муҳоҷирон ташкил медиҳанд, ба коми оташ рафт.
Бино ба иттилои бархе манобеи Azda tv аз шаҳри Маскав, субҳи 13-уми июни соли 2023, тақрибан соати 10:30 дақиқа ба вақти маҳаллӣ қисме аз бозори Садоводи шаҳри Маскав ба коми оташ рафтааст.
Дар аксу наворҳое, ки аз маҳалли ҳодиса ба идора фиристода шуд, дида мешавад, ки даҳҳо дукони тоҷирон сӯхта нобуд мешаванд ва бархе тоҷирон ба хотири наҷот додани молу колои худ аз ин сӯхтор ҷони худро дар хатар гузошта, вориди мағозаҳо мешаванд.
Инчунин дар аксу наворҳо дида мешавад, ки алангаи оташ ҳар лаҳза бузургтар шуда, то рафт маконҳои зиёдеро фаро мегирад, вале хадамоти сӯхторнишонӣ наметавонанд ба осонӣ онро хомӯш кунанд.
Гуфта мешавад, бозори Садоводи шаҳри Маскав дар қисмати ноҳияҳои ҷанубу шарқии пойтахти Русия ҷойгир буда, маҳсулоти асосии тоҷирон дар ин бозор либос ва поафзор аст. Ин бозор аз солҳои 90-уми асри гузашта инҷониб амал мекунад ва аксари тоҷирони амалкунанда дар онро муҳоҷирон ташкил медиҳанд.
Бархе шоҳидон мегӯянд, аксари зарардидагони ин сӯхтор зодагони кишварҳои Осиёи Марказӣ ва Қафқоз ҳастанд. Ва ҳоло мақомоти дахлдори шаҳри Маскав ба ҷои ҳодиса рафта, таҳқиқоти худро дар бораи сабабу омилҳои сар задани оташ оғоз кардаанд.
Инчунин баъзе расонаҳои русӣ дар ин бора иттилоъ додаанд, ки дар натиҷаи ин сӯхтор чанд мағоза комилан сӯхта нобуд шудааст. Дар бораи хисороти ҷонӣ ва ҳаҷми зарар то лаҳзаи омода намудани ин матлаб аз манбаъҳои расмӣ гузорише нашр нашудааст.
