Натиҷаи як таҳқиқоти сотсиологӣ дар Русия муайян кардааст, ки наздик ба 84% русҳо ҷонибдори эмгузаронии ройгон ба муҳоҷирони меҳнатӣ ҳастанд.
Тибқи як назарсанҷии Бунёди афкори ҷамъиятӣ (ФОМ), русҳо чунин мешуморанд, ки муҳоҷирони меҳнатӣ, ки дар Федератсияи Русия кор мекунанд, бояд ҳаққи эмгузаронии бепул бар зидди коронавирусро дошта бошанд. Дар натиҷаи насарсанҷӣ (84%) пурсидашудагони рус онро ҷонибдорӣ карданд, менависад Интерфакс.
Тибқи ин назарсанҷӣ, 84 % русҳо зарур шумориданд, ки барои ҳифзи саломатии аҳолии кишвар аз COVID-19 ҳатман эмгузаронии ройгон ба муҳоҷирон пиёда карда шавад. Аммо 8 % дигари русҳо муқобили эмкунии ройгон ба муҳоҷирон раъй додаанд. Ба назари онҳо шаҳрвандони хориҷие, ки барои кор ба Русия омадаанд ва мехоҳанд эм бигиранд, бояд маблағи воксинаро пардохт кунанд.
Мувофиқи маълумоти Бунёди афкори ҷамъиятӣ (ФОМ), боз 8% -и дигари иштирокчиёни ин тадқиқот ҳангоми назарсанҷӣ барои ибрози андеша душворӣ кашиданд.
Гуфта мешавад, ин тадқиқоти умумирусиягӣ рӯзи 23-25 июли соли равон гузаронида шуд, ки дар он 1500 нафар иштирок карданд.
Қаблан дар расонаҳои русӣ гузориш шуда буд, ки дар Маскав арзиши як воя воксинаи коронавирус барои муҳоҷирони корӣ 1300-1400 рубли русӣ аст. Аммо бархе аз муҳоҷирони корӣ мегӯянд, арзиши як воя воксинро бештар аз нархи муқаррар кардаи Вазорати тандурустии ин кишвар дарёфт мекунанд.
