Дар фурӯдгоҳҳои Тоҷикистону Русия беш аз 10 парвози ширкати “Уралские авиалинии” ба таъхир афтода ва ё лағв шудааст, ки ин боиси сарсонии садҳо мусофир гаштааст.
Гуфта мешавад, танҳо дар ду рӯзи охир (21-22 март) 9 парвози ҳавопаймоҳои ширкати “Уралские авиалинии” аз шаҳрҳои гуногуни Русия ба таъхир афтодааст.
Аз парвозҳои ба таъхирафтода, танҳо имрӯз, 22-юми март, ду парвоз ба Маскав анҷом шуда, парвозҳои боқимонда ба Маскав, Екатеринбург, Уфа, Челябинск ва ғайра боз ба таъхир афтодаанд.
Бино ба маълумоти онлайн-таблои фурӯдгоҳи Жуковский, дар ду рӯз аз 21 то 22-юми март 6 парвози ширкати “Уралские авиалинии” танҳо аз Маскав ба Тоҷикистон ё баръакс лағв шудааст. Ин парвозҳо ба Кӯлоб, Душанбе ва Хуҷанд буданд.
Инчунин парвози ҳавопаймоҳои ин ширкат барои 22-юми март аз шаҳрҳои Ростови лаби Дон, Екатеринбург, Сочи ва ду парвоз аз Маскав ба Душанбе ва аз Челябинск, Екатеринбург, Ростови лаби Дон ва Минералние Води ба Хуҷанд бекор шудаанд.
Умедҷон Лолаев, намояндаи ширкати “Уралские авиалинии” дар Тоҷикистон дар суҳбат бо Радиои Озодӣ гуфт, бар асоси таҳримҳо ҳавопаймоҳое, ки дар ҳудуди Аврупо сабт шуда буданд, аз парвоз мондаанд ва аз имрӯз ҳавопаймоҳоро дар Русия аз нав сабтином мекунанду дигар таъхир намешавад.
Аммо мардум, ки ҳоло дар фурӯдгоҳҳои Тоҷикистону Русия қарор доранд, аз ширкат талаб доранд, ки дар зудтарин парвоз онҳоро ба ҷойҳои худ баранд ё пулҳояшонро баргардонанд.
Ёдовар мешавем, ки баъд аз ҳамлаи Русия ба Украина, кишварҳои аврупоӣ алайҳи Маскав таҳримҳои сахт ҷорӣ карданд. Бар асари ҷорӣ шудани таҳримҳо даҳҳои ширкатҳои пурнуфузи ҳавопаймоӣ бозори Русияро тарк карданд, ки ин боиси халал дар реҷаи парвозҳои Русия шудааст.
