Писарбузурги Эмомалӣ Раҳмон, ки номзади ягонаи мақоми президентӣ аст, баъд аз як ҳафта расман ба ин вазифа интихоб ва сипас корро оғоз хоҳад кард.
Бино ба иттилои расмӣ, дар интихоботи қарибулвуқӯи Ассотсиатсияи футболи Осиёи Марказӣ(CAFA), ки қарор аст, 2-уми майи соли 2023 дар шаҳри Душанбе баргузор шавад, номзади ягонаи он Рустами Эмомалӣ, пирасбузурги Эмомалӣ Раҳмон бидуни рақиб президенти он интихоб хоҳад шуд.
Дар рафти ин интихобот номзадҳо ба мақоми ноиби президенти CAFA низ аз кишварҳои Афғонистон Муҳаммад Юсуф Коргар, аз Туркманистон Арсалан Айназаров ва аз Узбекистон Равшан Ирматов интихоб хоҳанд шуд. Президент ва муовинони ӯ барои солҳои 2023-2027 ба муддати чор сол интихоб мешаванд.
Гуфта мешавад, Ассотсиатсияи футболи Осиёи Марказӣ(CAFA), яке аз панҷ Ассотсиатсияҳои минтақавии Конфедератсияи футболи Осиё мебошад. CAFA моҳи июни соли 2014 таъсис ёфта ва сипас дар соли 2015 аз ҷониби Ассотсиатсияи футболи Осиё ACF тасдиқ шуд. Дар ҳоли ҳозир кишварҳои Тоҷикистон, Қазоқистону Қирғизистон, Узбекистону Туркманистон ва Афғонистон узви он мебошанд.
