Шаҳрдори Душанбе Рустами Эмомалӣ қасд дорад хонаи Устод Садриддин Айнӣ, Қаҳрамони миллии Тоҷикистонро хароб ва дар ҷои он бинои баландошиёна бисозад.
Адиби шинохтаи тоҷик Абдуқодири Рустам бо нашри як паёми ҳушдоромез ба шаҳрдории пойтахт гуфтааст: “Даст аз хонаи устод Айнӣ бардоред!!! Шарматон бод!!!! Маънои шаҳр ва шаҳрнишинӣ қатори қуттиҳои 16-у 20 табақа нест, риояти одоби шаҳрнишинӣ ва тамаддунофаринӣ аст……”
Шаҳрдори пойтахт бо баҳонаи тарсим ва таҳкими нақшаи генералии шаҳри Душанбе тайи 10 соли ахир қасд дорад тамоми осори боқимонда ва мероси фарҳангии бозмонда аз даврони Иттиҳоди Шӯравиро ба хок яксон карда, дар ҷои онҳо гулгашт ва ё ин, ки замини онҳоро бо нархҳои осмонӣ фурӯхта, соҳибкорон биноҳои баландошиёна бисозанд.
Шаҳрдори Душанбе пеш аз ин бинои ҳукумати шаҳр, бинои театри Маяковский, хонаи собиқ президенти Тоҷикистон Раҳмон Набиев, фаворраҳои назди бинои парлумон ва бино Чойхонаи Роҳатро ҳам дар маркази шаҳр хароб карда буд.
Қасди тахриби хонаи Устод Садриддин Айнӣ, Қаҳрамони миллии Тоҷикистон дар қалби Душанбе тавассути писари Эмомалӣ Раҳмон, президенти кишвар вокунишҳои тундеро дар ҷомеа ба бор овардааст.
