Шаби 12-уми ноябр дар бозори “Гулистон”-и шаҳри Панҷакенти вилояти Суғд сӯхтори бузурге рух дод, ки қисми зиёди бозорро фаро гирифт.
Ба иттилои Хадамоти давлатии оташнишонии Вазорати корҳои дохилии Тоҷикистон, дар натиҷаи ин ҳодиса 280 нуқтаи савдо ва 20 мағозаи ҳамшафати бозор осеб дидаанд.
Манбаъ мегӯяд, сӯхтор тақрибан соати 22:10 сар зада, дар муддати кӯтоҳ ба хонаҳои маскунии наздик ба бозор паҳн шудааст. Майдони умумии сӯхтор 792 метри мураббаъро ташкил дода, танҳо пас аз чаҳор соати талош кормандони Хадамоти оташнишонӣ тавонистаанд алангаи оташро пурра хомӯш кунанд.
Ба гуфтаи мақомоти расмӣ, аз коми оташ молу амвол ба маблағи беш аз 27 миллион сомонӣ наҷот дода шудааст. Хушбахтона, талафоти ҷонӣ ба қайд гирифта нашудааст. Ҳоло гурӯҳи махсус сабабҳои сӯхторро таҳқиқ мекунад.
Ин бори аввал нест, ки дар кишвар як бозори бузург оташ мегирад ва молу дороии тоҷирон ба коми оташ меравад. Солҳои охир чунин ҳодисаҳо зиёд рух медиҳанд. Дар бисёр ҳолатҳо масъулон мегӯянд, омили асосии сӯхтор дар бозорҳо ин риоят накардани қойдаҳои бехатарӣ аст. Аммо аксари савдогарон инро рад мекунанд ва камбудро аз ҷониби масъулони бозорҳо медонанд, ки шароитро барои чунин ҳолатҳо ба назар нагирифтанд.
Дар ҳоли ҳозир маълум нест, ки ба тоҷирони бозори “Гулистон” барои зарари расида ҷуброн пардохт мешавад ё на. Аммо дар гузашта тоҷироне, ки бар асари сӯхтор тиҷораташонро аз даст дода буданд, тибқи шикояташон, ҳеч ниҳоде ба онҳо ҷуброни зарар надодааст ва ин боиси муфлисшавии тиҷорати онҳо гаштааст.
