Президенти Тоҷикистон бо даъвати Президенти Имороти Муттаҳидаи Араб ба шаҳри Дубай хоҳад рафт.
Бино ба иттилои расмӣ, Эмомалӣ Раҳмон барои иштирок дар нишасти Сомзони Миллали Муттаҳид оид ба тағйирёбии иқлим озими Имороти Муттаҳидаи Араб хоҳад шуд.
Вазорати корҳои хориҷии Тоҷикистон мегӯяд, даъвтаномаи расмии Президенти Имороти Муттаҳидаи Араб Шайх Муҳаммад бин Зоид Оли Наҳёнро сафири Имороти Муттаҳидаи Араб дар Ҷумҳурии Тоҷикистон (бо иқоматгоҳ дар Остона) Муҳаммад Саид Муҳамад Ал-Ариқӣ ба Тоҷикистон овардааст.
Гуфта мешавад, субҳи имрӯз Сироҷиддин Муҳриддин, вазири корҳои хориҷии Тоҷикистон бо сафири Иморати Муттаҳидаи Араб дар Тоҷикистон дар шаҳри Душанбе мулоқот кард.
Дар рафти ин мулоқот даъватномаи расмӣ ба унвони Президенти Тоҷикистон Эмомалӣ Раҳмон “ҷиҳати иштирок дар Нишасти 28-уми СММ оид ба тағйирёбии иқлим (COP-28)” сафири ин кишвар ба Сироҷиддин Муҳриддин тақдим кардааст. Ин нишаст аз 30 ноябр то 12 декабри соли 2023 дар шаҳри Дубай баргузор хоҳад шуд.