Субҳи имрӯз Эмомалӣ Раҳмон дар раъси як ҳайати давлатӣ бо сафари корӣ ба Ишқобод рафт.
Ҳадаф аз сафари раисҷумҳур ширкат дар Нишасти сарони давлатҳои Тоҷикистон, Туркманистон ва Узбекистон гуфта мешавад.
Бино ба иттилои расмӣ, Эмомалӣ Раҳмони дар Ишқобод нахуст бо президенти ин кишвар Сардор Бердимуҳамедов ва сипас бо падари ӯ Қурбонгулӣ Бердимуҳамедов, раиси Халқ Маслаҳатии Туркманистон дидор ва гуфтгӯ кардааст.
Хадамоти матбуоти Тоҷикистон мегӯяд, Президенти Тоҷикистон дар мулоқот бо Президенти Туркманистон дар бораи рушд ва тавсеаи ҳамкориҳо суҳбат карда, бар “зарурати истифодаи имкониятҳои Комиссияи байниҳукуматӣ оид ба ҳамкориҳои тиҷоративу иқтисодӣ ва илмиву техникӣ, Шурои кории Тоҷикистону Туркманистон, ҳамчунин амалияи баргузории форумҳои соҳибкорон” таъкид карданд.
Ҳамзамон сарони давлатҳои сегона дар ин нишасти худ “масъалаҳои вобаста ба таҳкими минбаъдаи ҳамкориҳо дар самтҳои сиёсӣ, иқтисодиву тиҷоратӣ, энергетика, обу экология, нақлиёт ва дар дигар соҳаҳои мавриди манфиати муштаракро баррасӣ намуданд.”
Президенти Тоҷикистон, ки ду ҳафта пеш, 19-уми июли соли ҷорӣ бори панҷум Умра карда, ва сипас ба муддати беш аз 10 рӯз аз назари умум ва дурбини расонаҳо дур буд, ин дафъа мисли пешин мӯйи сарашро ранг нокарда ба дидори ҳамтоёни тукрманистонӣ ва узбекистониаш ба Ишқобод сафар кардааст.
Гуфта мешавад, бо вуҷуди он, ки Эмомалӣ Раҳмон дарозумртарин диктатор ва сарсахтарин раҳбарони исломҳарос дар минтақа шинохта мешавад, вале ҳар вақте умра кардааст, баъди он то ҳадди тавон аз тариқи васоити ахбори омма мусалмон будани худро ба намоиш гузоштааст.
Аммо, суол ин аст, акнун, ки Эмомалӣ Раҳмон умраш аз 70 сол гузашта ва ба назар мерасад, ба пирӣ тан додаву ин дафъа бо ранг накардани мӯйҳои сару рӯяш росташро ба мардум гуфтанист, ки вай мӯйсафед гардида ва вақти рафтанаш аз қудрат наздиктар шудааст ё тайи ин ду ҳафта ҳамеша маст будаву пеш аз сафар барои ранг кардани мӯйҳои сару рӯяш вақт наёфтааст, мавзӯи дигар аст?
