Президенти худкомаи Тоҷикистон Эмомалӣ Раҳмон имрӯз, 25-уми июн сафари кориашро аз Вилояти Мухтори Кӯҳистони Бадахшон оғоз кард.
Бино ба иддаои маркази матбуоти Президент, ҳадафи сафари Раҳмонов шиносоӣ бо шароити зиндагии мардум, назорат аз ҷараёни корҳои сохтмонӣ ва ободонӣ, иштирок дар ҷашни Рӯзи Ваҳдати миллӣ ва ифтитоҳи чанд иншооти иҷтимоиву инфрасохторӣ буда, он се рӯз идома хоҳад кард.
Раҳмонов сафарашро аз ноҳияи Ванҷ оғоз карда, ӯро мисли ҳамеша боҳашамат пешвоз гирифтанд.
Раисҷумҳури худкомаи кишвар роҳи автомобилгарди 16 километриро аз маркази ноҳияи Ванҷ то пайвастшавӣ ба шоҳроҳи Душанбе – Кӯлмаро мавриди истифода қарор дода, супориш додааст, ки 3 километр роҳҳои дохилишаҳрии ноҳияро низ таҷдид кунанд.
Тавре аз мақомоти маҳаллӣ хабар додаанд, бахшида ба 35-солагии Истиқлолияти давлатӣ дар ноҳияи Ванҷ сохтмони 140 иншооти гуногун ба нақша гирифта шуда, то имрӯз 90-тои онҳо пурра сохта ва мавриди истифода қарор дода шудаанд. Мақомот иддао дорад, ки ин иншоотҳо ба таъсиси ҷойҳои нави корӣ, беҳтар шудани шароити кор ва сатҳи хидматрасонӣ ба аҳолӣ, инчунин баланд бардоштани сатҳи зиндагии мардум мусоидат мекунанд.
Бояд гуфт, Раҳмонов аз дигар минтақаҳои ВМКБ низ дидан хоҳад кард ва дар рӯзи охири сафараш, яъне 27-уми июн ба шаҳри Хоруғ рафта, дар ҷашни Рӯзи Ваҳдати миллӣ иштирок хоҳад кард.
Ҷашни Ваҳдати миллӣ дар ҳоле баргузор мешавад, ки режими Раҳмонов соли 2015 тарафи дуюми созишномаи таърихии сулҳи миллӣ — Ҳизби наҳзати исломии Тоҷикистонро дар кишвар мамнуъ эълон намуда, роҳбарон ва даҳҳо узви онро барои солҳои тӯлонӣ равонаи зиндон кард. Илова бар ин, дар солҳои 2021–2022 ҳукумат эътирозҳои осоиштаи шаҳрвандонро дар Вилояти Мухтори Кӯҳистони Бадахшон — минтақае, ки имрӯз президент он ҷо қарор дорад, бо зӯр саркӯб намуда, чандин сокинони осоиштаро кушта, садҳо нафарро боздошту ба маҳбас андохтаанд.
