Тереза Рибейро, намояндаи Созмони Амният ва Ҳамкории Аврупо (САҲА) дар умури озодии матбуот аз мақомоти Тоҷикистон хост, тамоми рӯзноманигорони боздоштшударо озод кунад.
Хонум Тереза рӯзи 7-уми ноябр бо нашри паёме дар Твиттер ба 7 соли зиндон маҳкум шудани рӯзноманигор Завқибек Саидаминиро “боз як зарбаи дигар ба журналистика ва Васоити ахбори омма дар Тоҷикистон” унвон кард.
Ӯ дар паёми худ такъик карда, ки “ҳама рӯзноманигорони зиндонӣ бояд озод карда шаванд ва ба онҳо имкон дода шаванд, ки дар бораи масъалаҳои марбут ба ҷомеа, аз ҷумла дар масъалаҳои амният гузориш диҳанд.“
Ин намояндаи САҲА дар умури озодии матбуот дар хитоб ба мақомоти Тоҷикистон мегӯяд, ки “журналистика ҷиноят нест“.
Ин вокуниши хонум Тереза дар ҳолест, ки Додгоҳи ноҳияи Исмоили Сомонии шаҳри Душанбе рӯзи 3-уми ноябр рӯзноманигори шинохта Завқибек Саидаминиро ба 7 соли зиндон маҳкум кард.
Мақомоти тоҷик аз ин пеш рӯзноманигор Абдуллоҳ Ғурбатиро ба 7,5 сол ва Далери Имомалиро барои 10 сол аз озодӣ маҳрум сохтанд.
Мақомоти қудратии Тоҷикистон тобистони соли ҷорӣ дар пайи як амалиёти махсус шуморе аз рӯзноманигорон ва блогероне, ки каму беш аз мушкилоти мардум мегуфтанд ва камбуди фаъолияти масъулонро фош мекарданд, боздошту бо баҳонаҳои сохта барои солҳои тӯлонӣ равонаи зиндон карданд.
Дар пайи зиндонӣ кардани рӯзноманигорони тоҷик аксари созмонҳои ҳуқуқи башарӣ ва ҳомиёни рӯзноманигорон садо баланд карда, озодии онҳоро аз мақомоти кишвар талаб карданд.
