Бино ба иттилои Нерӯҳои марзбонии Кумитаи давлатии амнияти миллии Тоҷикистон, шаби 28-уми апрели соли 2023, тақрибан соати 1:30 байни марзбонони тоҷик ва як гурӯҳи мусаллаҳ, ки аз Афғонистон вориди Тоҷикистон шуданд, задухӯрд ба амал омад.
Тавре АМИТ “ХОВАР” бо такя ба Маркази матбуоти Отряди сарҳадии «Хоруғ»-и Раёсати Қӯшунҳои сарҳадии КДАМ дар Вилояти Мухтори Кӯҳистони Бадахшон хабар дод, муҳоҷимони мусаллаҳ қочоқбарони маводди мухаддир буда, аз 8 нафар иборат буданд, ки чанде аз онҳо шаҳрвандони Тоҷикистон низ будаанд.
Дар хабар гуфта мешавад, ин гуӯруҳ бо “роҳбарии Додихудо, Нодиршо ва Забӣ валади Муҳаммадсахӣ, сокинони қарияи Барпанҷаи вулусволии Шуғнони вилояти Бадахшони Афғонистон, бо мақсади интиқоли маводи мухаддир дар ҳаҷми махсусан калон ва силоҳу лавозимоти ҷангӣ, хати сарҳади давлатии Тоҷикистон ва Афғонистонро дар аломати 184-уми минтақаи муҳофизатии дидбонгоҳи сарҳадии 9-уми «Тишор»-и Отряди сарҳадии «Хоруғ» убур намуданд.”
Ба иттилои Маркази матбуоти КДАМ, дар ин амалиёт 3 нафар аз қочоқбарон дастгир шуданд, ки ҳарсе шаҳрвандони Тоҷикистон будаанд. Аз ҷумла, “Домуллоҷонов Эмин Амирович, соли таваллудаш 1982, зода ва истиқоматкунандаи шаҳри Бӯстони вилояти Суғд, Саидманзаров Нидо Сайфуллоевич, соли таваллудаш 1993, зодаи деҳаи Ёмчи ноҳияи Шуғнон, сокини шаҳри Хуҷанд ва Саидмурсалов Наврас Саидмусоевич, соли таваллудаш 1987, зода ва истиқоматкунандаи ноҳияи Шуғнони Вилояти Мухтори Кӯҳистони Бадахшон.”
Аз қочоқбарон “45 кг маводи мухаддири сахттаъсири навъи «героин», 1 адад автомати Калашников бо 4 адад тирдон, 74 дона тир, 1 адад дурбини махсуси назорати шабона, 10 (даҳ) ҳазор доллари ИМА дарёфт ва мусодира карда шуд.”
Гуфта мешавад, дар ин даргирӣ байни муҳоҷимони мусаллаҳ ва нерӯҳои марзбонии тоҷик “як нафар хидматчии ҳарбӣ” кушта шудааст. Аммо аз нафари кушташуда ном бурда нашудааст.
Дар ҳамин ҳол Радиои Озодӣ бо такя ба манобеаш хабар дод, ки дар ин задухӯрд Раҷабзода Комрон, сардори Раёсати Кумитаи давлатии амнияти миллии Тоҷикистон дар шаҳри Хоруғ кушта шудааст.
Рӯстами Ҷонӣ, рӯзноманигори тоҷик, ки бештар ахбори Бадахшонро пайгирӣ ва нашр мекунад, лаҳзае пеш дар саҳифаи фейсбукаш хабар дод, ки “Дигар сарчашмаҳо сабаби қатли сардори амнияти шаҳри Хоруғро ҷанҷол бо ҳамкорон гуфтаанд.“
.
