Торнамои Вазорати корҳои дохилаи Тоҷикистон сухтори имрӯзаи Ашанро шарҳ дода, сабаби сӯхторро дар расиши кӯтоҳи ноҳилҳои барқӣ арзёбӣ кардааст.
Дар натиҷаи расиши кӯтоҳи ноқилҳои барқӣ санаи 7-юми июли соли 2020 соати 14:20 дақиқа дар шифти ташнобхонаи (ҳоҷатхона) ошёнаи чоруми бинои Маркази савдои «Ашан», воқеъ дар кӯчаи Дӯстии халқҳо 17-и ноҳияи И. Сомонии шаҳри Душанбе, сӯхтор ба амал омад. Бо қабули хабар фавран ба ҷойи ҳодиса бо даъвати рақами се 14- адад нақлиётҳои сӯхторхомушкунии асосӣ ва махсуси ҷузъу томҳои Сарраёсати хадамоти давлатии оташнишонии ВКД сафарбар карда шуданд. Дар вақти ба маҳалли ҳодиса расидани кормандони Хадамоти давлатии оташнишонӣ дар масоҳати 1 метри мураббаъ шифтро забонаи оташ ва ошёнаи чорумро қисман дуди ғализ фаро гирифта буд.
Дар натиҷаи гузаронидани амалиёти фаврии кормандони Хадамоти давлатии оташнишонӣ дар як вақт тахминан 250 нафар кормандон ва мизоҷон, инчунин миқдори муайяни молу ашёҳои қиматнок аз бинои Маркази савдои мазкур ба ҷойи бехавф таҳлия карда шуда, ҳамзамон роҳҳои паҳншавии оташ дар ҳама самтҳо ба зуддӣ пешгирӣ карда шуда, сӯхтор дар масоҳати аввалааш ба зуддӣ хомӯш карда шуд.
Гунаҳгори ҳодиса муайян карда мешавад. Дар натиҷаи сӯхтор ҳеҷ кас зарари ҷисмонӣ набардоштааст. Таҳқиқи ҳодиса аз тарафи Сарраёсати хадамоти давлатии оташнишонӣ бурда мешавад. Дар ҷойи ҳодиса роҳбарияти ВКД Ҷумҳурии Тоҷикистон, Сарраёсати хадамоти давлатии оташнишонӣ ва дигар хадамоту мақомотҳои дахлдор ҳузур доштанд.
Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.