Тайи чанд рӯзи ахир як зодаи шаҳри Хоруғ, ки гирифтори бемории рӯҳист, дар боздоштгоҳи Кумитаи давлатии амнияти миллӣ қарор дорад ва бо иттиҳоми ҳамла ба кормандони ин ниҳод мавриди шиканҷа қарор гирифтааст.
Ҳамсояҳои боздоштшуда ба хабаргузории Pamir Daily News хабар доданд, ки рӯзи 1-уми ноябр дар назди бинои Кумитаи давлатии амнияти миллӣ дар маркази шаҳри Хоруғ сокини микрорайони “Тирчид”, Раимшоев Фирдавс Мусоевич, соли таваллудаш 1981, дар ҳолати мастӣ аз ҷониби кормандони ин ниҳод боздошт шудааст.
Ба гуфтаи онҳо, Раимшоев дар ҳамсоягии Имомназаров Охирназар зиндагӣ мекунад, ки чанд рӯз пеш аз ҷониби кормандони КДАМ бо гумони нигоҳдорӣ ва фурӯши маводи мухаддир боздошт шуда, дар видео гуноҳашро эътироф карда буд.
Наздиконаш мегӯянд, ки Фирдавс аз хурдӣ гирифтори бемории равонӣ буд, ки гоҳе он беморӣ авҷ мегирифт.
Манобеи “Pamir daily news” мегӯянд, Фирдавс аз боздошти ҳамсояаш Охирназар хабар ёфта, маст шуда, ба назди бинои Кумитаи давлатии амнияти миллии Тоҷикистон дар маркази Хоруғ меравад ва дар онҷо алайҳи ин ниҳод ва кормандони он ҳарфҳои қабеҳ мезанад. Ба гуфтаи онҳо, ин сабаби боздошти Фирдавс Раимшоев ва шиканҷа алайҳи ӯ мешавад.
Бо вуҷуди он ки наздикони Фирдавс тамоми асноди заруриро дар бораи бемории равонии ӯ пешниҳод карданд, кормандони КДАМ дар ВМКБ Фирдавсро аз боздоштгоҳ раҳо накардаанд.
Ба иддаои наздикони Раимшоев дар СИЗО борҳо бемории ӯ хуруҷ карда, чандин маротиба мошини ёрии таъҷилӣ омадааст. Илова бар ин, дар рӯйи ӯ осори латукӯб ва захмҳои калон дида шудаанд, ки аз мавриди шиканҷа қарор гирифтанаш шаҳодат медиҳанд.
Ба навиштаи “Pamir daily news” то замони нашри мавод сарнавишти Раимшоев номаълум боқӣ мемонад. Наздикони ӯ изҳори умедворӣ намудаанд, ки мақомоти вилоят ва ҷумҳурӣ тавассути расонаҳо ба қазияи ӯ таваҷҷӯҳ хоҳанд кард.