Дастаи футболи “Истиқлол”-и Душанбе бозии дуюми марҳилаи гурӯҳии Лигаи қаҳрамонҳои Конфедератсияи футболи Осиё (КФО)-2022-ро низ бохт.
Дар бозии дуюми худ “Истиқлол”-и Душанбе аз дастаи “Шарҷа”-и Аморот Муттаҳидаи Араб бо ҳисоби 1:2 шикаст хӯрд.
Дар ин бозӣ аз ҳайати дастаи “Истиқлол” голи ягонаро капитани даста Манучеҳр Ҷалилов дар дақиқаи 29-ум ба нишон расонида, ҳисобро боз кард. Аммо дар нимаи дуюми бозӣ футболбозони дастаи “Шарҷа” ду тубро ба ҳадаф расониданд.
Дастаи “Истиқлол” дар бозии якумаш дар марҳилаи гурӯҳии Лигаи чемпионҳои КФО-2022 дар гурӯҳи “А” аз дастаи “Ал-Райян”-и Қатар бо ҳисоби 2:3 мағлуб шуда буд.
Бозии навбатии худро дастаи “Истиқлол”-и Душанбе дар ин мусобиқа, 15-уми апрел бо пешсафи гуруҳи “А” – тими “Ал-Ҳилол” аз Арабистони Саудӣ мегузаронад, ки дар ду бозӣ пайиҳам ду ғалаба ба даст оварда аст.
Пас аз ду даври бозиҳо, дастаи футболи “Истиқлол”-и Душанбе дар гурӯҳи “А” бо касби 0 хол дар мақоми охирон қарор дошта, шонси аз ҳама кам дар гурӯҳро барои баромадан ба даври дигар дорад.
Бозиҳои гурӯҳи “А” дар Лигаи қаҳрамонҳои КФО-2022 дар Арабистони Саудӣ гузашта истодааст.
