Имрӯз, 24-уми июли соли 2025 иддае аз корбарони шабакаҳои иҷтимоӣ дар Фейсбук ва Инстаграм аз ҷорӣ шудани лимити барқ дар бархе шаҳру ноҳияҳои Тоҷикистон шикоят кардаанд.
Марворӣ Аҳмадзода, сокини ноҳияи Шаҳритӯси вилояти Хатлон гуфтааст, ки хитоб ба мақомот гуфтааст: “Дар сармо қувваи барқ нест дар Шаҳритус, ҳади ақал дар фасли гармо барқо хомӯш накунанд, имрӯзҳо хеле азоб мекашем.”
Ин шикояти Аҳмадзода, ки дар саҳфаи “Ахбор барои афкор”, яке аз пурхонандатаринҳо дар Фейсбук аст, бо вокунишҳои зиёде аз ҷониби даҳҳо нафар корбарони дигар шаҳру ноҳияҳои кишвар рӯбарӯ гардидааст.
Ба гуфтаи онҳо, дар ин фасли тобистон, ки дамои ҳаво хеле гарм аст, дар шаҳрҳои Ҳисору Ваҳдат ва Рӯдакиву Ёвон ҳам бархе сокинон аз камбуди нерӯи барқ танқисӣ мекашанд.
Гуфтанист, шикояти сокинони кишвар аз ҷорӣ шудани лимити барқ дар ин гармои тобистон дар ҳоле садо медиҳад, ки ҳамин чанд рӯз пеш Ҳукумати Тоҷикистон бо судури як қарор дастур дода буд, ки Лоиҳаи ҳамкорӣ бо Узбакистон дар соҳаи электроэнергетикаро ба имзо бирасад.
Тоҷикистон дар ҳоли ҳозир дар ҳама мавсимҳои сол қисме аз неруи барқи тавлидшуда дар кишварро ба кишварҳои Узбекистону Қирғизисон, Қазоқистону Афғонистон мефурӯшад ва бо Покистон ҳам шартномаҳоеро рӯи даст дорад, ки дар сурати такмил шудани сохтмони НОБ-и “Роғун” тавассти КАСА-1000 нерӯи барқ бифурӯшад.
Аммо бо таваҷҷуҳ ба таҷриба ва шинохте, ки мардум аз ҳукумати 34-солаи Эмомалӣ Раҳмон доранд, ҳеч кас кафолат дода наметавонад, ки ба хотири пул шуда, ҳаҷми ин берақиҳоро ин фасли гарми тобистон аз ин ҳам зиёдтар накунад ва сокинони кишварро мисли ин рӯзҳои гарм бебарқ гузорад ва ё дар дигар фаслҳои сол низ дар сардиву торикӣ нигаҳ надорад.
